لاہور: پنجاب ڈیزاسٹر مینجمنٹ اتھارٹی (پی ڈی ایم اے) نے صوبے بھر میں دھند اور سموگ کی بڑھتی ہوئی شدت کے پیشِ نظر الرٹ جاری کرتے ہوئے کمشنرز اور ڈپٹی کمشنرز کو بروقت اور مؤثر اقدامات یقینی بنانے کی ہدایات جاری کر دی ہیں۔
ڈی جی پی ڈی ایم اے عرفان علی کاٹھیا کے مطابق پنجاب کے میدانی اضلاع لاہور، گجرانوالہ، شیخوپورہ، قصور، ننکانہ صاحب، فیصل آباد، جھنگ، ٹوبہ ٹیک سنگھ، ساہیوال، لیہ، کوٹ ادو، ملتان، بہاولپور، رحیم یار خان اور خانپور شدید دھند اور سموگ کی زد میں آسکتے ہیں۔
ڈی جی پی ڈی ایم اے نے خبردار کیا ہے کہ سموگ کے باعث سانس کے امراض، آنکھوں کی جلن اور دیگر بیماریوں کے خدشات بڑھ جاتے ہیں جبکہ بچے اور بزرگ افراد اس صورتحال سے زیادہ متاثر ہوسکتے ہیں۔ دھند کے باعث سڑکوں پر ٹریفک حادثات میں اضافے کا امکان بھی ظاہر کیا گیا ہے۔
پی ڈی ایم اے نے واضح کیا ہے کہ فصلوں کی باقیات، کوڑا کرکٹ، ٹائرز، پلاسٹک، پولی تھین بیگز، ربڑ اور چمڑا جلانے پر مکمل پابندی ہے اور خلاف ورزی کی صورت میں مقدمات درج کیے جائیں گے۔ اسی طرح دھواں چھوڑنے والی گاڑیوں اور انڈسٹریل یونٹس کے خلاف بھی سخت کریک ڈاؤن کا حکم جاری کیا گیا ہے۔
عرفان علی کاٹھیا نے کہا کہ سموگ کے تدارک کے لیے اداروں اور عوام کو مشترکہ طور پر کردار ادا کرنا ہوگا۔ انہوں نے انتظامیہ کو ہدایت کی کہ انسدادِ سموگ آگاہی مہم بھرپور طریقے سے چلائی جائے تاکہ عوام کو احتیاطی تدابیر سے آگاہ کیا جا سکے۔
پی ڈی ایم اے کے مطابق ماحولیاتی آلودگی پر قابو پا کر شہریوں کو بیماریوں سے محفوظ رکھا جا سکتا ہے، جبکہ کوتاہی برتنے والے افسران کے خلاف سخت کارروائی عمل میں لائی جائے گی۔
مزید معلومات اور اپڈیٹس کے لیے پی ڈی ایم اے کی جاری کردہ ہدایات پر عمل کرنے کی اپیل کی گئی ہے.
