صوبہ پنجاب کی انسداد دہشت گردی اینڈ ہارڈنڈ دی اسٹیٹ کمیٹی کا ایک اہم اجلاس منعقد ہوا جس کی صدارت صوبائی وزیر قانون ملک صہیب احمد بھرتھ نے کی۔ اجلاس میں سیکرٹری داخلہ ڈاکٹر احمد جاوید قاضی، اے آئی جی چودھری سلطان، ڈی آئی جی اسپیشل برانچ خرم شہزاد، ڈی آئی جی سی ٹی ڈی عثمان گوندل، صوبہ بھر کے کمشنرز، انڈسٹری، پنجاب سیف سٹی، سوشل ویلفیئر اور دیگر متعلقہ اداروں کے افسران نے شرکت کی۔
اجلاس میں نیشنل ایکشن پلان کے تحت صوبہ پنجاب میں جاری اقدامات کا تفصیلی جائزہ لیا گیا۔ اجلاس میں چائنیز باشندوں کی فوری مدد اور راہنمائی کے لیے خصوصی واٹس ایپ نمبر جاری کرنے کا فیصلہ کیا گیا ۔ صوبائی وزیر قانون ملک صہیب احمد بھرتھ کا کہنا تھا کہ صوبہ بھر میں جاری پراجیکٹس پر کام کرنے والی ورک فورس کی ویری فکیشن کا عمل تیز رفتاری سے جاری ہے جبکہ سرحدی علاقوں، خصوصاً ڈی جی خان اور میانوالی میں قانون نافذ کرنے والے ادارے مکمل طور پر متحرک ہیں۔ملک صہیب احمد بھرتھ نے بتایا کہ دہشت گردوں کے خلاف مؤثر کارروائی کے لیے چھ جدید اسالٹ ڈرونز فراہم کیے جا رہے ہیں ۔جن میں سے ایک ڈرون پہلے ہی ڈی جی خان میں فراہم کر دیا گیا ہے۔ بلوچستان میں پنجاب کے شہریوں کے خلاف کارروائیوں کی روک تھام کے لیے مسافر بسوں کو خصوصی سیکیورٹی فراہم کی جا رہی ہے۔
انہوں نے مزید بتایا کہ نیشنل ایکشن پلان کے تحت صوبہ پنجاب میں 14 جوائنٹ چیک پوسٹس کی تعمیر جاری ہے، جن میں 6 نان ڈیجیٹل اور 5 ڈیجیٹل جوائنٹ چیک پوسٹس کی تعمیر تیز رفتاری سے ہو رہی ہے۔سی ٹی ڈی پنجاب کی کارکردگی پر روشنی ڈالتے ہوئے انہوں نے بتایا کہ سی ٹی ڈی نے دہشت گردوں کے خلاف 2 ہزار انٹیلیجنس بیسڈ آپریشنز کیے ہیں۔ 25,641 کومبنگ آپریشنز کیے گئے جبکہ سی ٹی ڈی اہلکاروں اور افسران کی 137 ٹریننگز بھی ہوئیں۔صوبائی وزیر قانون نے کمشنرز کو ہدایت دی کہ صوبہ میں غیر قانونی طور پر موجود غیر ملکی باشندوں کا ڈیٹا مرتب کیا جائے۔ انہوں نے تعلیمی اداروں میں موجود غیر ملکی اور دیگر صوبوں سے آنے والے طالب علموں کا ڈیٹا بھی جمع کرنے کی ہدایت کی۔ مزید یہ کہ پنجاب ہائی ویز اور موٹروے کے داخلی و خارجی راستوں پر ڈیجیٹل مانیٹرنگ کے لیے اسپیشل برانچ، سیف سٹی اور موٹروے انتظامیہ کو باہمی تعاون بڑھانے کی ہدایت دی۔انہوں نے بتایا کہ صوبہ بھر میں پیشہ ور بھکاریوں کے خلاف 876 مقدمات درج کیے گئے ہیں جبکہ سعودی عرب جاکر بھیک مانگنے والے افراد کے پاسپورٹ منسوخ کیے جا رہے ہیں۔منشیات کے خلاف جاری کریک ڈاؤن کے حوالے سے انہوں نے کہا کہ اب تک 19 ہزار کلوگرام سے زائد چرس، 1700 کلوگرام ہیروئن اور 1010 کلوگرام آئس پکڑی گئی ہے۔صوبائی وزیر قانون ملک صہیب احمد بھرتھ نے کہا کہ صوبہ میں مربوط کریمینل جسٹس سسٹم پر کام تیزی سے جاری ہے جبکہ غیر قانونی پٹرول پمپس کے خلاف بھرپور کارروائی کی جا رہی ہے۔آخر میں صوبائی وزیر قانون نے کہا کہ وزیر اعلیٰ پنجاب مریم نواز شریف کی قیادت میں صوبہ میں امن و امان کا قیام حکومت کی اولین ترجیح ہے۔
