لاہور: وزیراعلیٰ پنجاب مریم نواز شریف کی خصوصی ہدایت پر درختوں کے تحفظ اور انسدادِ سموگ کے لیے محکمہ جنگلات کی جانب سے مری میں قبضہ مافیا کے خلاف بڑا آپریشن کیا گیا۔
محکمہ جنگلات نے مری فاریسٹ ڈویژن میں 200 کنال قیمتی سرکاری زمین قبضہ مافیا سے واگزار کرا لی۔ آپریشن کے دوران کمرشل عمارتیں، دیواریں اور غیر قانونی تعمیرات بھاری مشینری کے ذریعے مسمار کی گئیں۔
اس بھرپور کارروائی میں 120 فاریسٹ افسران اور گارڈز نے حصہ لیا، جبکہ اینٹی انکروچمنٹ مہم میں مزید تیزی لانے کا فیصلہ بھی کیا گیا ہے۔ محکمہ جنگلات کے مطابق، قبضہ مافیا سے زمین واگزار کرا کے جنگلاتی علاقوں کی بحالی ماحولیاتی نظام کی بہتری میں ایک اہم سنگِ میل ہے۔
ترجمان محکمہ جنگلات کا کہنا تھا کہ:
“جنگلات کی حفاظت صرف زمین بچانا نہیں بلکہ عوام کی صحت اور ماحول کے تحفظ کی ضمانت ہے۔ جنگلاتی اراضی کی واگزاری سموگ کے خاتمے اور ماحولیاتی توازن کی بحالی میں کلیدی کردار ادا کرے گی۔”
محکمہ جنگلات نے واضح کیا کہ زیرو ٹالرنس پالیسی کے تحت جنگلات کے تحفظ کے لیے کارروائیاں جاری رہیں گی۔ آپریشن محکمہ جنگلات، ضلعی انتظامیہ، پولیس اور ریونیو ڈیپارٹمنٹ کی مشترکہ کوششوں سے انجام دیا گیا۔
زمینوں کی واگزاری ماحولیاتی تحفظ اور سموگ کے خاتمے کی سمت ایک اہم قدم ہے۔ وزیراعلیٰ پنجاب مریم نواز شریف کی ہدایت پر ایسے آپریشنز آئندہ بھی تسلسل سے جاری رہیں گے تاکہ صوبے میں قدرتی وسائل کا تحفظ یقینی بنایا جا سکے
