ممبئی: بالی وڈ کے معروف اداکار عمران ہاشمی نے اپنی چمکتی اور تروتازہ جلد کے حوالے سے ایسا انکشاف کیا ہے جس نے مداحوں سمیت ساتھی فنکاروں کو بھی حیران کردیا ہے۔
بھارتی میڈیا رپورٹس کے مطابق عمران ہاشمی اور اداکارہ یامی گوتم ان دنوں سپرن ورما کی ہدایتکاری میں بننے والی فلم ’حق‘ کی تشہیری مہم میں مصروف ہیں۔ اسی دوران ایک انٹرویو میں عمران ہاشمی سے ان کی اسکن گلو کا راز پوچھا گیا۔
عمران ہاشمی کا کہنا تھا کہ فلم کے ڈائریکٹر سپرن ورما روزانہ شوٹنگ کے دوران ان سے پوچھتے تھے کہ وہ چہرے کی چمک برقرار رکھنے کے لیے کیا کرتے ہیں؟ جس پر اداکار نے حیران کن جواب دیا کہ وہ اکثر شوٹنگ کے بعد گھر جا کر میک اپ بھی نہیں اتارتے اور صرف ہینڈ واش سے ہی منہ دھولیتے ہیں۔
یہ جواب سن کر یامی گوتم نے بھی ہنستے ہوئے کہا کہ سپرن ورما عمران کی چمکدار جلد کے اتنے دیوانے ہیں کہ وہ ان سے ڈائٹ، ورزش، کھانے پینے کی عادات اور سپلیمنٹس کے بارے میں بھی مسلسل سوال کرتے رہتے ہیں۔
عمران ہاشمی نے مزاحیہ لہجے میں کہا کہ “میں تو سمجھ رہا تھا کہ میں اچھا اداکار ہوں، لیکن پتا چلا کہ ڈائریکٹر میری ایکٹنگ سے زیادہ میری جلد کے دیوانے ہیں!”
فلم ’حق‘ جلد ہی سینما گھروں میں نمائش کے لیے پیش کی جائے گی۔
