ممبئی: بالی وڈ ایکشن ہیرو سنی دیول نے اپنے والد اور لیجنڈری اداکار دھرمیندر کی ابتدائی جدوجہد سے متعلق اہم انکشاف کیا ہے۔ ایک حالیہ انٹرویو میں سنی دیول نے بتایا کہ دھرمیندر کے فلمی سفر کے آغاز میں حالات اتنے مشکل تھے کہ ان کے پاس کپڑے خریدنے تک کے پیسے نہیں ہوتے تھے۔
“منوج کمار اور والد کا سفر ایک ساتھ شروع ہوا”
سنی دیول نے بتایا کہ ان کے والد دھرمیندر اور اداکار و ہدایتکار منوج کمار کا فلمی سفر تقریباً ایک ساتھ شروع ہوا تھا۔
سنی دیول کے مطابق:
“بچپن میں ہم نے دونوں کو ہمیشہ ساتھ دیکھا، ان کے درمیان بہت اچھا تعلق تھا۔”
انہوں نے مزید بتایا کہ دھرمیندر نے خود انہیں بتایا تھا کہ کیریئر کے آغاز میں جب منوج کمار کے پاس کبھی کچھ پیسے ہوتے، وہ کپڑے خریدنے جاتے تو دھرمیندر سے کہتے:
“آؤ دھرم، تم بھی دو قمیضیں لے لو۔”
سنی دیول کا کہنا تھا کہ یہ ایک خوبصورت اور سادہ دور تھا جو اب کبھی لوٹ کر نہیں آئے گا۔
منوج کمار کا حالیہ انتقال
واضح رہے کہ بھارتی سینما کے معروف اداکار منوج کمار 87 برس کی عمر میں انتقال کر گئے تھے، جس پر بالی وڈ سمیت دنیا بھر کے فلمی حلقوں نے افسوس کا اظہار کیا۔
دھرمیندر کی موت کی جھوٹی خبریں — سنی دیول برہم
حال ہی میں بھارتی میڈیا کے کئی بڑے اداروں—جن میں انڈیا ٹوڈے، اے بی پی نیوز، نیوز 18 اور ہندوستان ٹائمز شامل تھے—نے دھرمیندر کی موت کی جھوٹی خبریں نشر کر دیں، جسے اہلخانہ نے سختی سے مسترد کر دیا۔
سنی دیول میڈیا نمائندگان پر برس پڑے اور اپنی رہائش گاہ کے باہر تلخ لہجے میں کہا:
“آپ کے گھر میں ماں باپ اور بچے ہیں؟ اگر ہیں تو ویڈیو کیوں بنا رہے ہو؟ آپ لوگوں کو شرم نہیں آتی!”
دھرمیندر کی صحت سے متعلق جھوٹی خبروں پر سوشل میڈیا پر بھی بھارتی میڈیا کے کردار پر سخت تنقید کی گئی۔
