بنوں: سیکیورٹی فورسز اور قانون نافذ کرنے والے اداروں نے خیبر پختونخوا کے ضلع بنوں میں مشترکہ خفیہ اطلاع پر مبنی آپریشن کرتے ہوئے بھارتی حمایت یافتہ فتنہ الخوارج کے 8 دہشتگردوں کو ہلاک کر دیا۔
پاک فوج کے شعبہ تعلقاتِ عامہ (آئی ایس پی آر) کے مطابق کارروائی خوارج کی موجودگی کی مصدقہ اطلاعات پر کی گئی۔ آپریشن کے دوران دہشتگردوں کے ٹھکانے کو مؤثر انداز میں نشانہ بنایا گیا، جس کے نتیجے میں اسلحہ اور بھاری مقدار میں گولہ بارود بھی برآمد ہوا۔
آئی ایس پی آر کے مطابق ہلاک دہشتگرد سیکیورٹی فورسز پر حملوں، قانون نافذ کرنے والے اداروں کے اہلکاروں کی ٹارگٹ کلنگ اور متعدد دہشتگردانہ سرگرمیوں میں ملوث تھے۔ رپورٹ کے مطابق بھارتی حمایت یافتہ یہ گروہ علاقے کے امن کے لیے سنگین خطرہ بنا ہوا تھا۔
ترجمان کے مطابق یہ کامیاب کارروائی سیکیورٹی فورسز اور قانون نافذ کرنے والے اداروں کے مضبوط باہمی تعاون کا عملی ثبوت ہے، جس کے نتیجے میں خطے میں انٹیلی جنس پر مبنی آپریشنز میں نمایاں اضافہ ہوا ہے۔
آئی ایس پی آر کا کہنا ہے کہ خوارج کی نقل و حرکت کو محدود کرنے کے لیے منظم، مربوط اور ہم آہنگ حفاظتی اقدامات کیے جا رہے ہیں، جبکہ علاقے میں موجود باقی دہشتگردوں کے خاتمے کے لیے کلیئرنس آپریشن جاری ہے۔
پاک فوج نے واضح کیا کہ ملک سے دہشتگردی کے مکمل خاتمے کے لیے “عزمِ استحکام” کے وژن کے تحت کارروائیاں بھرپور طریقے سے جاری رہیں گی۔
