بنوں میں سیکیورٹی فورسز نے انٹیلی جنس اطلاعات کی بنیاد پر بڑا آپریشن کرتے ہوئے 22 دہشتگردوں کو ہلاک کردیا۔ آئی ایس پی آر کے مطابق کارروائی فتنۂ خوارج کی موجودگی کی مصدقہ اطلاع پر کی گئی، جس دوران دہشتگردوں کے قائم ٹھکانوں کو مؤثر انداز میں نشانہ بنایا گیا۔ فائرنگ کے شدید تبادلے کے بعد تمام 22 دہشتگرد مارے گئے۔
فوجی ترجمان کے مطابق علاقے میں کلیئرنس آپریشن جاری ہے تاکہ بھارتی سرپرستی یافتہ مزید خوارج کی موجودگی کا مکمل خاتمہ کیا جاسکے۔ آئی ایس پی آر نے کہا کہ عزمِ استحکام کے تحت دہشتگردی کے خلاف کارروائیاں اس وقت تک جاری رہیں گی جب تک ملک سے اس کا مکمل خاتمہ نہ ہوجائے۔
بیان میں مزید کہا گیا کہ غیر ملکی پشت پناہی سے چلنے والے دہشتگرد نیٹ ورکس کا خاتمہ بنیادی قومی ہدف ہے اور سیکیورٹی فورسز اپنے عزم پر قائم ہیں۔
وزیراعظم کا خراجِ تحسین
وزیراعظم شہباز شریف نے بنوں آپریشن پر سیکیورٹی فورسز کو خراجِ تحسین پیش کیا ہے۔ انہوں نے کہا کہ 22 دہشتگردوں کی ہلاکت ایک بڑی کامیابی ہے اور پوری قوم دہشتگردی کے خاتمے کی جنگ میں افواجِ پاکستان کے ساتھ کھڑی ہے۔ وزیراعظم نے اس عزم کا اظہار کیا کہ ملک سے ہر قسم کی دہشتگردی کا مکمل خاتمہ کیا جائے گا.
