کراچی: کراچی ٹریفک پولیس نے ایک ماہ کے دوران جاری ای چالان کی تفصیلات جاری کر دی ہیں۔ رپورٹ کے مطابق ایک ماہ میں شہر میں ٹریفک خلاف ورزیوں پر 93,000 سے زائد ای چالان کیے گئے اور جرمانے کی مجموعی رقم 71 کروڑ روپے سے تجاوز کر گئی۔
سب سے زیادہ چالان سیٹ بیلٹ نہ لگانے پر ہوئے، جن کی تعداد 57,541 اور جرمانہ 57 کروڑ 54 لاکھ 10 ہزار روپے رہا۔ موٹر سائیکل سواروں کو ہیلمٹ نہ پہننے پر 22,227 چالان کیے گئے، جن پر 11 کروڑ 11 لاکھ 35 ہزار روپے جرمانہ عائد کیا گیا۔
ٹریکر نصب ڈمپر، ٹریلر اور واٹر ٹینکر میں تیز رفتاری پر 1,188، عام ڈرائیونگ میں تیز رفتاری پر 2,699 اور سگنل کی خلاف ورزی پر 3,102 چالان ہوئے۔
فینسی نمبر پلیٹ پر 1,278 اور رنگین شیشوں والی گاڑیوں پر 1,178 چالان کیے گئے، جن پر رنگین شیشوں والی گاڑیوں کے جرمانے کی رقم 2 کروڑ 94 لاکھ 50 ہزار روپے رہی۔ اسٹاپ لائن کی خلاف ورزی پر 611 اور رانگ وے پر 426 چالان کیے گئے۔
ٹریفک پولیس نے عوام سے اپیل کی ہے کہ ٹریفک قوانین کی پابندی کریں تاکہ حادثات اور جرمانوں سے بچا جا سکے۔
