اسلام آباد: وفاقی وزیر داخلہ محسن نقوی نے ایف 8 میں واقع آور لیڈی آف فاطمہ کیتھولک چرچ میں کرسمَس کی مناسبت سے منعقدہ خصوصی تقریب میں شرکت کی۔ وزیر داخلہ کا استقبال اسلام آباد اور راولپنڈی کے آرچ بشپ جوزف ارشد نے کیا۔
تقریب میں بچوں نے وفاقی وزیر داخلہ کو ویلکم پھول اور ٹیبلو پیش کیا، جبکہ کرسمَس گیت بھی پیش کیے گئے۔ محسن نقوی نے آرچ بشپ جوزف ارشد اور مسیحی برادری کے ساتھ مل کر کرسمَس کیک کاٹا اور مسیحی برادری کو کرسمَس کی مبارکباد دی۔ انہوں نے تقریب میں امن کی شمع بھی روشن کی۔
وزیر داخلہ محسن نقوی نے خطاب کرتے ہوئے کہا کہ کرسمَس خوشیوں، محبت اور بھائی چارے کا پیغام دیتا ہے اور یہ ایک خوشیوں بھرا تہوار ہے۔ انہوں نے مزید کہا کہ قائداعظم کے مطابق پاکستان میں بسنے والی تمام کمیونٹیز برابر ہیں اور تمام پاکستانی یکساں حقوق رکھتے ہیں۔
محسن نقوی نے کہا کہ کرسمَس کے موقع پر فول پروف سکیورٹی انتظامات یقینی بنائے گئے ہیں۔ تقریب میں چیف کمشنر اسلام آباد، آئی جی اسلام آباد پولیس، ڈپٹی کمشنر اور ایڈیشنل ڈپٹی کمشنر اسلام آباد بھی شریک تھے۔
