وزیراعظم محمد شہباز شریف سے پاکستان میں تعینات سعودی سفیر نواف بن سعید المالکی کی ملاقات

اسلام آباد: وزیراعظم محمد شہباز شریف سے پاکستان میں تعینات مملکتِ سعودی عرب کے سفیر، عزت مآب نواف بن سعید احمد المالکی نے آج شام وزیراعظم ہاؤس میں ملاقات کی۔

ملاقات کے دوران وزیراعظم نے خادمِ حرمینِ شریفین، عزت مآب شاہ سلمان بن عبدالعزیز آل سعود اور سعودی عرب کے وزیراعظم و ولی عہد، عزت مآب شہزادہ محمد بن سلمان بن عبدالعزیز آل سعود کے لیے اپنے گہرے احترام اور نیک تمناؤں کا اظہار کیا۔

وزیراعظم نے پاکستان اور سعودی عرب کے درمیان دوطرفہ تعلقات پر اطمینان کا اظہار کرتے ہوئے دونوں ممالک کے دیرینہ اور برادرانہ تعلقات کو مزید مستحکم اور گہرا کرنے کے مضبوط عزم کا اعادہ کیا۔ اس موقع پر انہوں نے پاکستان کی مسلسل حمایت پر ولی عہد شہزادہ محمد بن سلمان کا شکریہ ادا کیا، جس کے نتیجے میں دونوں ممالک کے درمیان تعلقات مزید مضبوط ہوئے۔

وزیراعظم نے رواں برس کے دوران ولی عہد شہزادہ محمد بن سلمان کے ساتھ ہونے والی ملاقاتوں کا حوالہ دیتے ہوئے کہا کہ یہ ملاقاتیں نہایت نتیجہ خیز رہیں اور پاک سعودی تعلقات کو نئی بلندیوں تک لے جانے میں اہم کردار ادا کیا۔ انہوں نے ضرورت کے وقت سعودی عرب کی جانب سے پاکستان کی مسلسل حمایت اور علاقائی امن و استحکام کے فروغ میں مملکت کے تعمیری کردار کو بھی سراہا۔

ملاقات کے دوران حالیہ علاقائی اور عالمی صورتحال پر بھی تبادلۂ خیال کیا گیا۔ وزیراعظم نے امن و استحکام کے فروغ کے لیے مذاکرات اور سفارت کاری کی اہمیت پر زور دیا۔

اس موقع پر سعودی سفیر نے خادمِ حرمینِ شریفین شاہ سلمان بن عبدالعزیز آل سعود اور ولی عہد شہزادہ محمد بن سلمان بن عبدالعزیز آل سعود کی جانب سے وزیراعظم کے لیے تہنیتی پیغام پہنچایا۔ انہوں نے پاکستان کے ساتھ باہمی دلچسپی کے تمام شعبوں میں تعاون کو مزید فروغ دینے کے مملکت کے عزم کا اعادہ کیا۔