بلوچستان میں سکیورٹی فورسز نے خفیہ اطلاعات کی بنیاد پر دو الگ الگ کامیاب کارروائیاں کرتے ہوئے بھارتی پراکسی نیٹ ورکس سے تعلق رکھنے والے 41 دہشتگردوں کو ہلاک کر دیا۔ کارروائیاں 29 جنوری کو ضلع ہرنائی اور پنجگور میں کی گئیں۔
پاک فوج کے شعبہ تعلقات عامہ (آئی ایس پی آر) کے مطابق پہلی کارروائی ضلع ہرنائی کے نواحی علاقے میں کی گئی، جہاں سکیورٹی فورسز نے دہشتگردوں کے ایک ٹھکانے کو مؤثر طریقے سے نشانہ بنایا۔ شدید فائرنگ کے تبادلے کے بعد بھارتی سرپرستی میں سرگرم فتنہ الخوارج اور فتنہ الہندوستان سے وابستہ 30 دہشتگرد مارے گئے۔
آئی ایس پی آر کا کہنا ہے کہ ہلاک دہشتگردوں کے قبضے سے بڑی مقدار میں اسلحہ اور دھماکا خیز مواد برآمد ہوا، جبکہ موقع پر موجود خطرناک مواد کو فوری طور پر تلف کر دیا گیا تاکہ کسی بھی ممکنہ نقصان سے بچا جا سکے۔
دوسری کارروائی ضلع پنجگور میں خفیہ اطلاع پر عمل میں لائی گئی، جہاں سکیورٹی فورسز نے دہشتگردوں کے ایک اور ٹھکانے کو تباہ کیا۔ اس آپریشن میں فتنہ الہندوستان سے تعلق رکھنے والے 11 بھارتی حمایت یافتہ دہشتگرد ہلاک ہوئے۔
ترجمان آئی ایس پی آر کے مطابق پنجگور میں مارے گئے دہشتگردوں کے قبضے سے اسلحہ، گولہ بارود اور بینک ڈکیتی کے دوران لوٹی گئی رقم بھی برآمد کی گئی۔ یہ رقم 15 دسمبر 2025 کو پنجگور میں ہونے والی بینک ڈکیتی کے دوران چھینی گئی تھی۔
آئی ایس پی آر نے مزید بتایا کہ ہلاک ہونے والے تمام دہشتگرد ماضی میں متعدد دہشتگردانہ سرگرمیوں میں ملوث رہے اور سکیورٹی فورسز کو طویل عرصے سے مطلوب تھے۔
بیان میں کہا گیا ہے کہ علاقے میں مزید بھارتی حمایت یافتہ دہشتگردوں کی موجودگی کے پیشِ نظر کلیئرنس آپریشن جاری ہیں۔ ’عزمِ استحکام‘ کے وژن کے تحت انسدادِ دہشتگردی کی مہم پوری شدت کے ساتھ جاری رہے گی۔
آئی ایس پی آر نے اس عزم کا اعادہ کیا کہ سکیورٹی فورسز اور قانون نافذ کرنے والے ادارے غیر ملکی سرپرستی میں ہونے والی دہشتگردی کے مکمل خاتمے کے لیے پرعزم ہیں اور دشمن کے ناپاک عزائم کو ہر صورت ناکام بنایا جائے گا۔
