’ابھی مزید ریلیف کی گنجائش موجود ہے‘، حافظ نعیم کا بجلی کی قیمتوں میں کمی پر وزیراعظم سے اظہارتشکر

وزیراعظم شہباز شریف سے جماعت اسلامی پاکستان کے امیر حافظ نعیم الرحمان کا ٹیلیفونک رابطہ ہوا ہے۔

حافظ نعیم الرحمان نے بجلی کی قیمتوں میں کمی پر وزیراعظم سے اظہار تشکر کیا۔ اس موقع پر شہباز شریف کا کہنا تھاکہ مشکلات کے باوجود عوامی ریلیف کو اولین ترجیح دی، یہ مشن جاری رکھیں گے اور پاکستان کی ترقی کا سفر جاری رکھیں گے۔

دونوں رہنماؤں نے غزہ میں اسرائیلی بربریت پربین الاقوامی قوتوں کی خاموشی پر تشویش کا اظہار  کیا۔ وزیراعظم نے فلسطینیوں پرصہیونی ظلم وجبر کےخلاف ہربین الاقوامی فورم پرآواز اٹھانے کے عزم کا اعادہ کیا اور کہا کہ نہتے فلسطینی بہن بھائیوں کی حمایت سے متعلق پاکستان کا مؤقف واضح ہے۔

دوسری جانب حافظ نعیم کا اپنی ٹوئٹ میں کہنا تھاکہ وزیراعظم شہباز شریف سے ٹیلی فونک رابطے میں غزہ کی صورتحال پر بات ہوئی، پاکستان کو فلسطینی مظلوم عوام کے حق میں فعال اور مؤثر کردار ادا کرنا چاہیے۔

انہوں نے کہا کہ وزیراعظم کے بجلی کی قیمتوں میں کمی کے اعلان کا خیر مقدم کرتے ہیں لیکن ابھی عوام کو مزید ریلیف دینے کی بڑی گنجائش موجود ہے، لہٰذا مزید آئی پی پیز سے بات چیت کرکے معاہدوں پر نظرثانی کی جائے۔

 خیال رہے کہ گزشتہ دنوں وزیراعظم شہباز شریف نے گھریلو اور صنعتی صارفین کے لیے بجلی کی قیمتوں میں کمی کا اعلان کیا تھا۔ گھریلو صارفین کے لیے بجلی کی فی یونٹ قیمت میں 7.15 روپےکمی کی گئی ہے۔ بجلی کی فی یونٹ اوسط قیمت45.05 روپے سےکم کرکے 37.64 روپےکردی گئی۔

دستاویز کے مطابق کمرشل صارفین کے لیے بجلی کی فی یونٹ قیمت میں 8.58 روپے کمی کی گئی ہے جس کے بعد فی یونٹ بجلی71.06 روپے سے62.47 روپے ہوگئی۔