مقبوضہ کشمیر میں ہونے والے پہلگام حملے کے بعد پاکستانی اداکار فواد خان کی بھارتی فلم ‘عبیر گلال’ کی ریلیز ایک بار پھر خطرے میں پڑ گئی۔
فواد خان کی فلم ‘عبیر گلال’ کی ریلیز ہندو انتہا پسندوں کی جانب سے شروع سے ہی تنازع کا شکار رہی لیکن اس سب کے باوجود فلم کا ٹیزر اور گانا بھی ریلیز کیا گیا۔
تاہم اب پہلگام واقعے کے بعد انڈین فلم اینڈ ٹیلی ویژن ڈائریکٹرز ایسوسی ایشن کے صدر اشوک پنڈت نے فلم کی ریلیز کی مخالفت کرتے ہوئے کہا کہ یہ واقعہ قوم کیخلاف ایک جنگی کارروائی ہے، یہ پہلی بار نہیں ہے، یہ حملے 30 سال سے جاری ہیں۔
انہوں نے کہا کہ فیڈریشن کے طور پر ہم نے پاکستانیوں کے ساتھ ہاتھ جوڑ کر کام نہ کرنے کی درخواست کی ہے، فنکاروں کو پہلے قوم کا سوچنا چاہیے، اگر میرے گھر کا آدمی نہیں مارا تو مجھے کوئی فرق نہیں پڑتا، لیکن اگر اس فلم کی ہیروئن یا میکرز کے گھر والوں کو دہشت گرد نے گولی مار دی ہوتی تو وہ پاکستانی آرٹسٹ فواد کے ساتھ کام نہ کرتے۔
اس کے علاوہ فیڈریشن آف ویسٹرن انڈیا سین ایمپلائز کے صدر بی این تیواری نے بھی سخت مؤقف اختیار کرتے ہوئے کہا کہ ہم فلم ‘عبیر گلال’ کو بھارت میں ریلیز نہیں ہونے دیں گے، اور اگر فلم ریلیز کی گئی تو فلم بنانے والوں کے خلاف کارروائی بھی کی جائے گی۔
یاد رہے کہ 3 روز قبل مقبوضہ کشمیر کے ضلع پہلگام کے سیاحتی مقام پر فائرنگ کے واقعے میں 26 افراد ہلاک اور ایک درجن زخمی ہو گئے تھے۔
