اسلام آباد: وفاقی وزیر خزانہ سینیٹر محمد اورنگزیب نے پریس کانفرنس میں کہا ہے کہ حکومت نے آئی ایم ایف کے ساتھ اسٹاف لیول معاہدہ مکمل کر لیا ہے اور این ایف سی ایوارڈ کے حوالے سے اگلے ہفتے اجلاس ہوگا۔
وزیر خزانہ نے بتایا کہ حکومت ڈھانچہ جاتی اصلاحات پر عمل پیرا ہے اور اصلاحات کے عمل میں پیش رفت جاری ہے۔ انہوں نے کہا کہ کلائمیٹ فنانسنگ اہم ہے اور مینوفیکچرنگ کے شعبے میں بہتری خوش آئند ہے۔ پائیدار ترقی کے لیے ادائیگی کے توازن اور کرنٹ اکاؤنٹ اہم ہیں، جبکہ مجموعی طور پر برآمدات میں پانچ فیصد اضافہ ریکارڈ کیا گیا ہے۔
انہوں نے مزید کہا کہ معاشی بہتری کے تسلسل کو برقرار رکھنا ضروری ہے۔ آئی ٹی شعبے میں ماہانہ بہتری دیکھی جا رہی ہے اور ترسیلات زر میں بھی اضافہ ہو رہا ہے۔ آئی ٹی سیکٹر بہترین کارکردگی پیش کر رہا ہے اور حکومت نجی شعبے کی حوصلہ افزائی کر رہی ہے۔
محمد اورنگزیب نے کہا کہ پالیسی ریٹ میں کمی نے قرض کی ادائیگی پر مثبت اثر ڈالا ہے اور پانڈا بانڈ کا جلد اجراء متوقع ہے۔ وزیر خزانہ نے کہا کہ حکومت سب کچھ ’’پاکستان فرسٹ‘‘ کے ایجنڈے کے تحت آگے بڑھا رہی ہے.