سونے کی قیمت میں 11 ہزار 200 روپے کا بڑا اضافہ، فی تولہ 4 لاکھ 65 ہزار 236 روپے کا ہوگیا

کراچی: ملک میں سونے کی قیمت میں ایک بار پھر بڑا اضافہ ریکارڈ کیا گیا ہے، جس کے بعد فی تولہ سونے کی قیمت 4 لاکھ 65 ہزار روپے سے تجاوز کرگئی۔
آل پاکستان جیمز اینڈ جیولرز ایسوسی ایشن کے مطابق آج ملک میں فی تولہ سونے کی قیمت میں 11 ہزار 200 روپے کا اضافہ ہوا، جس کے بعد سونا 4 لاکھ 65 ہزار 236 روپے فی تولہ کا ہوگیا۔
ایسوسی ایشن کے مطابق 10 گرام سونے کی قیمت بھی 9 ہزار 602 روپے بڑھ گئی، جس کے بعد 10 گرام سونے کی قیمت 3 لاکھ 98 ہزار 864 روپے ہوگئی۔
دوسری جانب عالمی مارکیٹ میں بھی سونے کی قیمت میں نمایاں تیزی دیکھی گئی۔ عالمی بازار میں سونے کی قیمت 112 ڈالر اضافے کے بعد 4 ہزار 427 ڈالر فی اونس ہوگئی ہے۔
واضح رہے کہ گزشتہ سات روز کے دوران سونے کی قیمت میں مجموعی طور پر تقریباً 33 ہزار روپے کی کمی ریکارڈ کی گئی تھی، تاہم آج آٹھویں روز سونے کے بھاؤ میں ایک ہی دن میں 11 ہزار 200 روپے کا اضافہ ہوگیا۔
ماہرین کے مطابق عالمی مالیاتی منڈیوں میں اس وقت سرمایہ کاروں کی نظریں 4 ستمبر کو جاری ہونے والے امریکی نان فارم پے رولز (NFP) ڈیٹا پر مرکوز ہیں۔ امریکی روزگار کے اعداد و شمار عالمی منڈیوں میں شرح سود اور ڈالر کی سمت کے حوالے سے اہم سمجھے جاتے ہیں، جس کے اثرات سونے کی قیمت پر بھی مرتب ہوتے ہیں۔
رپورٹ کے مطابق جولائی میں روزگار کے شعبے میں کمزوری اور 25 ہزار افراد کے روزگار سے نکالے جانے کی اطلاعات کے باعث سونے کی قیمت میں تیزی کا رجحان پیدا ہوا تھا۔ تاہم گزشتہ سات روز کے دوران فیڈرل ریزرو سے متعلق بیانات اور عالمی مالیاتی عوامل کے باعث سونے کی قیمت پر دباؤ رہا۔
اب امریکی روزگار کے تازہ اعداد و شمار سے قبل عالمی سرمایہ کار محتاط انداز میں مارکیٹ کی صورتحال کا جائزہ لے رہے ہیں، جبکہ عالمی سطح پر سونے کی قیمت میں آج ہونے والے نمایاں اضافے کا اثر پاکستان کی مقامی صرافہ مارکیٹ پر بھی پڑا ہے۔
سونے کی قیمت میں حالیہ اتار چڑھاؤ کے باعث مقامی مارکیٹ میں بھی کاروباری سرگرمیوں اور خریداروں کی دلچسپی متاثر ہو رہی ہے، جبکہ سرمایہ کار عالمی مارکیٹ کے ساتھ ساتھ امریکی معاشی اعداد و شمار پر بھی گہری نظر رکھے ہوئے ہیں۔