تہران/واشنگٹن: ایران کی پاسداران انقلاب نے امریکی صدر Donald Trump ڈونلڈ ٹرمپ کے اس دعوے کو مسترد کر دیا ہے جس میں انہوں نے کہا تھا کہ ایران اور امریکا کے درمیان امن معاہدے پر آج دستخط ہو جائیں گے۔
ایرانی پاسداران انقلاب کی جانب سے جاری بیان میں کہا گیا ہے کہ ایرانی مذاکراتی ٹیم پہلے ہی واضح کر چکی ہے کہ اتوار کے روز کسی بھی معاہدے پر دستخط نہیں کیے جائیں گے، اس لیے امریکی صدر کا بیان حقائق کے منافی ہے۔
بیان میں دعویٰ کیا گیا کہ صدر ٹرمپ 14 جون کو اپنی سالگرہ کے موقع پر معاہدے کی دستخطی تقریب منعقد کرنا چاہتے ہیں تاکہ اسے علامتی اہمیت دی جا سکے۔ پاسداران انقلاب کے مطابق امریکی صدر اس موقع کو اپنی سیاسی اور ذاتی تشہیر کے لیے استعمال کرنا چاہتے ہیں، جبکہ مذاکراتی عمل کو اس انداز میں پیش کرنا حقیقت سے مطابقت نہیں رکھتا۔
دوسری جانب صدر ٹرمپ نے ایک بیان میں کہا تھا کہ ایران کے ساتھ امن معاہدے پر دستخط آج متوقع ہیں اور معاہدہ طے پاتے ہی آبنائے ہرمز تمام بحری آمدورفت کے لیے مکمل طور پر کھول دی جائے گی۔ ان کا کہنا تھا کہ خطے میں حالات معمول پر آنے کے بعد جوہری مواد کی باقیات سے متعلق معاملات بھی مناسب وقت پر نمٹا لیے جائیں گے۔
امریکی صدر نے اس امید کا اظہار بھی کیا تھا کہ معاہدے سے متعلق تمام مراحل جلد اور آسانی سے مکمل ہوں گے۔ ان کے مطابق امریکا مستقبل میں ایران اور پورے مشرق وسطیٰ کے ساتھ بہتر تعلقات اور تعاون کے نئے دور کا خواہاں ہے۔
ایران اور امریکا کے بیانات میں واضح تضاد سامنے آنے کے بعد مبصرین کا کہنا ہے کہ دونوں ممالک کے درمیان مذاکرات کی حقیقی صورتحال اب بھی غیر واضح ہے۔ تجزیہ کاروں کے مطابق اگرچہ سفارتی رابطے جاری ہیں، تاہم کسی حتمی معاہدے یا دستخطی تقریب کے حوالے سے تاحال کوئی مشترکہ اور باضابطہ اعلان سامنے نہیں آیا۔
ماہرین کا خیال ہے کہ حالیہ متضاد بیانات خطے میں جاری سفارتی سرگرمیوں اور ایران کے جوہری پروگرام سے متعلق بین الاقوامی بحث کو مزید پیچیدہ بنا سکتے ہیں، جبکہ عالمی برادری دونوں ممالک کے درمیان ممکنہ پیش رفت پر گہری نظر رکھے ہوئے ہیں۔