بھارتی وزیراعظم نریندر مودی کو بحرِ ہند میں واقع افریقی جزیرہ ملک سیشلز کے دورے کے دوران ملک کے اعلیٰ ترین اعزاز “گارڈین آف دی بلیو ہورائزن” سے نوازا گیا، تاہم اس اعزاز کے اجرا اور سرٹیفکیٹ میں موجود غلطیوں نے نئی بحث چھیڑ دی ہے۔
اعزاز سیشلز کے صدر پیٹرک ہرمینی نے ایک خصوصی تقریب میں مودی کو پیش کیا، لیکن تقریب کے بعد سامنے آنے والے سرٹیفکیٹ میں متعدد املا کی غلطیاں سامنے آئیں۔ سرٹیفکیٹ میں “Republic” اور “Seychelles” کی اسپیلنگ درست نہ ہونے پر سوشل میڈیا اور سیاسی حلقوں میں سوالات اٹھائے گئے۔
رپورٹس کے مطابق مذکورہ اعزاز مودی کے دورے سے صرف چند روز قبل متعارف کرایا گیا تھا اور وہ اس کے پہلے وصول کنندہ ہیں۔ بعض میڈیا رپورٹس میں یہ دعویٰ بھی کیا گیا کہ سرٹیفکیٹ کا جائزہ لینے پر اس کے بڑے حصے مصنوعی ذہانت (AI) کی مدد سے تیار کیے جانے کے آثار ملے۔
بھارت کی اپوزیشن جماعت کانگریس نے معاملے پر حکومت کو شدید تنقید کا نشانہ بنایا۔ کانگریس رہنما سپریا شرینیت نے کہا کہ جلد بازی میں تیار کیے گئے سرٹیفکیٹ میں ملک کا سرکاری نام تک درست نہیں لکھا جا سکا، جبکہ انہوں نے طنزیہ انداز میں کہا کہ وزیراعظم کسی بھی اعزاز کے لیے فوراً پہنچ جاتے ہیں۔
دوسری جانب بھارتیہ جنتا پارٹی (بی جے پی) نے اعزاز کو بھارت کی عالمی ساکھ اور وزیراعظم مودی کی قیادت کا اعتراف قرار دیتے ہوئے اپوزیشن کی تنقید کو مسترد کر دیا۔
ادھر سیشلز کی وزارت خارجہ نے وضاحت جاری کرتے ہوئے کہا کہ غلطیوں والا سرٹیفکیٹ دراصل ابتدائی مسودہ تھا جو غلطی سے جاری ہو گیا، جبکہ بعد میں درست اور باضابطہ منظوری یافتہ ورژن جاری کر دیا گیا۔ وزارت نے یہ بھی واضح کیا کہ “گارڈین آف دی بلیو ہورائزن” ملک کا ایک حقیقی اعزاز ہے۔
سیاسی مبصرین کے مطابق وزیراعظم مودی کے دورِ حکومت میں مختلف ممالک کی جانب سے دیے جانے والے بین الاقوامی اعزازات توجہ کا مرکز رہے ہیں۔ گزشتہ برس بھی وہ کئی ممالک کے اعلیٰ اعزازات حاصل کرنے والے پہلے غیر ملکی رہنما بنے تھے۔
پاکستانی وزیر اطلاعات عطا اللہ تارڑ نے بھی اس معاملے پر ردعمل دیتے ہوئے کہا کہ اگر کسی اعزاز کو دورے سے چند روز قبل تخلیق کیا جائے، سرٹیفکیٹ میں بنیادی غلطیاں ہوں اور وصول کنندہ اس کا پہلا اور واحد حامل ہو تو ایسے اقدامات امیج بلڈنگ کے بجائے سوالات کو جنم دیتے ہیں۔