لاہور: وزیر اطلاعات و ثقافت پنجاب عظمیٰ بخاری نے کہا ہے کہ “ستھرا پنجاب” کے بعد اب “ستھرا پاکستان” مہم کا عملی آغاز ہو چکا ہے، جس کے تحت احتساب کے عمل کو مؤثر بنایا جا رہا ہے۔ انہوں نے کہا کہ جو عناصر یہ کہتے تھے کہ اداروں میں احتساب نہیں ہوتا، ان کے لیے یہ واضح پیغام ہے کہ ایک ادارے نے اپنے ملازم کو سزا سنا کر مثال قائم کی ہے، اب دیگر اداروں کو بھی بسم اللہ کرنی چاہیے۔
ڈی جی پی آر میں وزیر زراعت سید عاشق حسین کرمانی کے ہمراہ پریس کانفرنس کرتے ہوئے عظمیٰ بخاری کا کہنا تھا کہ وزیراعلیٰ پنجاب مریم نواز شریف کے عوامی خدمت پر مبنی اقدامات کی آواز اب پوری دنیا میں گونج رہی ہے۔ انہوں نے کہا کہ ماضی میں ہمیں یورپ اور برطانیہ کی مثالیں دی جاتی تھیں، آج دنیا پنجاب کے ترقیاتی ماڈل اور شفاف گورننس کی مثالیں دے رہی ہے، جو نہ صرف پنجاب بلکہ پاکستان کے لیے بھی باعثِ فخر ہے۔
وزیر اطلاعات نے کہا کہ ملک کو درپیش دہشت گردی کی نئی لہر کے خلاف پاک فوج اور تمام قانون نافذ کرنے والے ادارے بھرپور عزم کے ساتھ برسرپیکار ہیں۔ انہوں نے آرمی پبلک اسکول کے شہداء کو خراجِ عقیدت پیش کرتے ہوئے کہا کہ ان کی قربانیاں کبھی فراموش نہیں کی جا سکتیں۔
انہوں نے پنجاب کابینہ کے حالیہ اجلاس میں کیے گئے اہم فیصلوں سے آگاہ کرتے ہوئے کہا کہ وزیراعلیٰ مریم نواز شریف کی حکومت نے گورننس، شفافیت اور میرٹ کا ایک نیا ماڈل متعارف کرایا ہے جسے عالمی سطح پر سراہا جا رہا ہے۔ “ستھرا پنجاب” ماڈل میں عالمی ادارے دلچسپی لے رہے ہیں اور اسے دیگر ممالک میں نافذ کرنے کی خواہش ظاہر کی جا رہی ہے۔
عظمیٰ بخاری نے بتایا کہ کابینہ نے افسران کے خلاف انکوائری کے نظام میں بڑی اصلاحات کی منظوری دی ہے، جس کے تحت اب ہر انکوائری تین ماہ میں مکمل کرنا لازم ہوگا تاکہ بے گناہ افراد کو غیر ضروری اذیت سے بچایا جا سکے اور قصورواروں کو بروقت سزا دی جا سکے۔
انہوں نے بتایا کہ وزیراعلیٰ پنجاب نے راولپنڈی میں دوسرے آئی ٹی سٹی کے قیام، جدید اسمارٹ ٹریفک مینجمنٹ سسٹم اور پیدل چلنے والوں کے لیے خصوصی بٹن سسٹم والی ٹریفک لائٹس نصب کرنے کی منظوری دی ہے۔ امتحانی نظام کی شفافیت کے لیے ایک خودمختار ادارہ قائم کرنے کا بھی فیصلہ کیا گیا ہے جو اسکول انتظامیہ سے الگ ہو کر امتحانات کا انعقاد کرے گا۔
صحت کے شعبے سے متعلق فیصلوں پر بات کرتے ہوئے وزیر اطلاعات نے بتایا کہ فیصل آباد کے ہولی فیملی اسپتال میں درکار آلات کی فراہمی، مری کے مدر اینڈ چائلڈ اسپتال کو جنرل اسپتال کا درجہ دینے اور گوجرانوالہ میں نئے کارڈیالوجی اسپتال کے قیام کی منظوری دی گئی ہے۔
انہوں نے بتایا کہ وزیراعلیٰ پنجاب نے 720 محنت کشوں کے فلیٹس کی قرعہ اندازی مکمل ہونے کے بعد سات دن میں حوالگی کی ہدایت دی ہے، جبکہ مزید 1872 فلیٹس 18 ماہ میں مکمل کیے جائیں گے۔ 36 لاکھ روپے مالیت کے یہ فلیٹس محنت کشوں کو بالکل مفت فراہم کیے جا رہے ہیں، جبکہ بیواؤں اور معذور محنت کشوں کو بغیر قرعہ اندازی فلیٹس دینے کی ہدایت بھی کی گئی ہے۔
زرعی شعبے پر بات کرتے ہوئے عظمیٰ بخاری نے گندم کی ریکارڈ پیداوار پر وزیر زراعت اور ان کی ٹیم کو خراجِ تحسین پیش کیا اور کہا کہ وزیراعلیٰ مریم نواز شریف کا کسانوں کے ساتھ کھڑے رہنے کا عزم غیر متزلزل ہے۔
سوالات کے جواب میں وزیر اطلاعات نے کہا کہ ایک ادارے کی جانب سے اپنے ملازم کے خلاف کارروائی خوش آئند پیش رفت ہے، تاہم یہ عمل یہیں رکنا نہیں چاہیے۔ انہوں نے واضح کیا کہ جو عناصر اپنے اختیارات سے تجاوز کرتے ہوئے سیاست میں مداخلت کرتے ہیں یا کسی ایک جماعت کے مفادات کے لیے نظام کو موڑتے ہیں، اس روایت کا مکمل خاتمہ ہونا چاہیے۔
عظمیٰ بخاری نے کہا کہ “ستھرا پاکستان” کی اصلاحی مہم کو وہ آگے بڑھتا ہوا دیکھ رہی ہیں اور یہ ضروری ہے کہ تمام ادارے خود احتسابی کے عمل سے گزریں تاکہ نظام کو درست سمت میں لایا جا سکے.
