سلہٹ: سلہٹ ٹیسٹ میں پاکستان اور بنگلا دیش کے درمیان دلچسپ مقابلہ اپنے فیصلہ کن مرحلے میں داخل ہوگیا ہے جہاں قومی ٹیم 437 رنز کے مشکل ہدف کے تعاقب میں مضبوط مزاحمت کے بعد جیت کے قریب پہنچ گئی ہے۔
چوتھے روز کھیل کے اختتام پر پاکستان نے اپنی دوسری اننگز میں 7 وکٹوں کے نقصان پر 316 رنز بنا لیے ہیں۔ وکٹ کیپر بیٹر محمد رضوان 75 رنز کے ساتھ کریز پر موجود ہیں جبکہ ساجد خان 8 رنز بنا کر ان کا ساتھ دے رہے ہیں۔ پاکستان کو تاریخی کامیابی کے لیے مزید 121 رنز درکار ہیں جبکہ بنگلا دیش کو میچ جیتنے کے لیے صرف 3 وکٹیں حاصل کرنا ہوں گی۔
پاکستان نے چوتھے روز اپنی دوسری اننگز کا آغاز اذان اویس اور عبد اللہ فضل کے ساتھ کیا، تاہم ابتدائی مرحلے میں قومی ٹیم کو مشکلات کا سامنا کرنا پڑا۔ عبد اللہ فضل صرف 6 رنز بنا کر ناہید رانا کی گیند پر آؤٹ ہوگئے جبکہ اذان اویس 21 رنز کی اننگز کھیلنے کے بعد پویلین لوٹ گئے۔
ابتدائی دو وکٹیں جلد گرنے کے بعد کپتان شان مسعود اور بابر اعظم نے ذمہ دارانہ بیٹنگ کرتے ہوئے ٹیم کو سنبھالا اور اہم شراکت قائم کی۔ بابر اعظم نے خوبصورت اسٹروکس کھیلتے ہوئے 52 گیندوں پر 47 رنز بنائے تاہم وہ تیج الاسلام کی گیند پر آؤٹ ہوگئے۔ دوسری جانب شان مسعود نے عمدہ بیٹنگ کا مظاہرہ کرتے ہوئے 71 رنز کی اہم اننگز کھیلی اور ٹیم کی پوزیشن مستحکم بنانے میں اہم کردار ادا کیا۔
میچ کے آخری سیشن میں محمد رضوان نے نہایت پراعتماد بیٹنگ کرتے ہوئے بنگلادیشی باؤلرز کا ڈٹ کر مقابلہ کیا اور نصف سنچری مکمل کی۔ ان کی ذمہ دارانہ اننگز نے پاکستان کی امیدیں برقرار رکھی ہوئی ہیں جبکہ آخری دن میچ کے سنسنی خیز اختتام کی توقع کی جا رہی ہے۔
واضح رہے کہ بنگلا دیش نے پہلی اننگز میں 278 رنز بنائے تھے، جس کے جواب میں پاکستان کی پوری ٹیم 232 رنز پر آؤٹ ہوگئی تھی اور میزبان ٹیم کو 46 رنز کی برتری حاصل ہوگئی تھی۔ بعد ازاں بنگلا دیش نے دوسری اننگز میں 390 رنز اسکور کر کے پاکستان کو جیت کے لیے 437 رنز کا بڑا ہدف دیا تھا۔
اب میچ کے آخری روز تمام نظریں محمد رضوان اور پاکستانی لوئر آرڈر پر مرکوز ہوں گی کہ آیا قومی ٹیم یہ مشکل ہدف حاصل کر کے یادگار فتح اپنے نام کر پاتی ہے یا بنگلا دیش آخری تین وکٹیں حاصل کر کے کامیابی سمیٹ لیتا ہے۔
