بھارتی گلوکار اور ریپر Badshah کی اہلیہ، اداکارہ Esha Rakhi کی ایک اور مبہم سوشل میڈیا پوسٹ نے ان کے ازدواجی تعلقات سے متعلق قیاس آرائیوں کو مزید ہوا دے دی ہے۔
چند روز قبل ایشا رکھی نے اپنی انسٹاگرام اسٹوری پر شادی کی یادوں پر مبنی دو ویڈیوز شیئر کرتے ہوئے لکھا تھا کہ “ہر طوفان ایک سبق ہے اور ہر دعا ایک امید ہے”۔ اس پوسٹ کے بعد سوشل میڈیا پر یہ چہ مگوئیاں شروع ہو گئی تھیں کہ شاید جوڑے کے درمیان اختلافات پیدا ہو چکے ہیں۔
اب ایشا رکھی نے ایک نئی انسٹاگرام اسٹوری شیئر کی ہے، جس میں انہوں نے کسی کا نام لیے بغیر اپنے جذبات کا اظہار کیا۔ انہوں نے لکھا کہ بعض لڑائیاں ایسی ہوتی ہیں جو جسم پر کوئی نشان نہیں چھوڑتیں، لیکن انسان کے اندر گہرے اثرات چھوڑ جاتی ہیں۔
اداکارہ نے مزید تحریر کیا کہ ایک طویل عرصے تک وہ خاموش رہیں کیونکہ وہ خوفزدہ تھیں۔ ان کے بقول وہ اپنے شوہر کے اثر و رسوخ، طاقت اور وسائل کو اپنے لیے رکاوٹ سمجھتی رہیں اور یہی محسوس کرتی رہیں کہ خاموشی اختیار کرنا ہی سب سے محفوظ راستہ ہے۔
اپنی پوسٹ میں ایشا رکھی نے کہا کہ ان کی خاموشی کبھی بھی رضامندی کی علامت نہیں تھی بلکہ یہ صرف خود کو محفوظ رکھنے کی کوشش تھی۔ انہوں نے لکھا کہ “آج میں نے خوف کے بجائے ہمت کا انتخاب کیا ہے۔ میں ابھی پوری کہانی سنانے کے لیے تیار نہیں، لیکن اب یہ ظاہر کرنا بھی نہیں چاہتی کہ سب کچھ ٹھیک ہے۔”
اس پوسٹ کے بعد سوشل میڈیا صارفین کی جانب سے مختلف تبصرے سامنے آ رہے ہیں۔ کچھ صارفین اسے ازدواجی زندگی میں ممکنہ کشیدگی کا اشارہ قرار دے رہے ہیں، جبکہ بعض کا کہنا ہے کہ جب تک متعلقہ فریقین کی جانب سے باضابطہ مؤقف سامنے نہیں آتا، علیحدگی یا تنازع سے متعلق کسی نتیجے پر پہنچنا قبل از وقت ہوگا۔
واضح رہے کہ بادشاہ اور ایشا رکھی کی شادی کی خبر رواں برس مارچ میں منظر عام پر آئی تھی۔ اس سے قبل بادشاہ کی پہلی شادی Jasmine Masih سے ہوئی تھی، جو تقریباً آٹھ برس بعد اختتام پذیر ہوئی، جبکہ اس شادی سے ان کی ایک بیٹی بھی ہے۔ فی الحال بادشاہ یا ایشا رکھی کی جانب سے سوشل میڈیا پر گردش کرنے والی قیاس آرائیوں پر کوئی باضابطہ بیان سامنے نہیں آیا ہے۔
