لاہور: پاکستان کرکٹ بورڈ نے قومی کرکٹرز کو بیرون ملک مختلف لیگز میں شرکت کی اجازت دے دی، جس کے تحت متعدد پاکستانی کھلاڑی کیریبین پریمیئر لیگ (CPL) سمیت غیر ملکی ٹورنامنٹس میں ایکشن میں نظر آئیں گے۔
پی سی بی کی جانب سے جاری کردہ این او سیز کے مطابق حسن نواز، حنین شاہ، نسیم شاہ اور عثمان خان کو کیریبین پریمیئر لیگ میں شرکت کے لیے اجازت دے دی گئی ہے۔
اسی طرح معاذ صداقت، صاحبزادہ فرحان، سفیان مقیم اور شاداب خان کو بھی سی پی ایل کھیلنے کے لیے این او سی جاری کیے گئے ہیں۔
پی سی بی کے مطابق مذکورہ کھلاڑیوں کو 19 اگست سے 21 ستمبر تک بیرون ملک لیگ میں شرکت کی اجازت دی گئی ہے۔
اس کے علاوہ قومی ٹیم کے اسپنر نعمان علی کو انگلش کاؤنٹی لنکا شائر کی نمائندگی کے لیے 27 ستمبر تک این او سی جاری کیا گیا ہے۔
وکٹ کیپر بیٹر محمد حارث بھی کیریبین پریمیئر لیگ میں شرکت کریں گے، جنہیں 7 اگست سے 20 ستمبر تک کا این او سی دیا گیا ہے۔
مسٹری اسپنر عثمان طارق کو بھی سی پی ایل میں شرکت کی اجازت مل گئی ہے۔ انہیں 8 اگست سے 18 ستمبر تک این او سی جاری کیا گیا ہے۔
اسی طرح اسپنر اسامہ میر کو 7 اگست سے 21 ستمبر تک کیریبین پریمیئر لیگ کھیلنے کی اجازت دی گئی ہے۔
یوں پی سی بی کی جانب سے این او سیز جاری کیے جانے کے بعد متعدد پاکستانی کرکٹرز کو غیر ملکی لیگز میں اپنی صلاحیتوں کے اظہار کا موقع ملے گا۔ سی پی ایل میں پاکستانی کھلاڑیوں کی شرکت سے نہ صرف انہیں بین الاقوامی سطح پر تجربہ حاصل ہوگا بلکہ مختلف ممالک کے کھلاڑیوں کے ساتھ کھیلنے اور جدید ٹی ٹوئنٹی کرکٹ کے تقاضوں سے ہم آہنگ ہونے کا موقع بھی ملے گا۔
پی سی بی کی جانب سے این او سی کا فیصلہ ایسے وقت میں سامنے آیا ہے جب پاکستانی کرکٹرز کی مختلف عالمی ٹی ٹوئنٹی لیگز میں شرکت کا سلسلہ جاری ہے، جبکہ کھلاڑیوں کے لیے ملکی اور بین الاقوامی کرکٹ کے شیڈول میں توازن برقرار رکھنا بھی اہمیت اختیار کرچکا ہے۔
