میڈرڈ/پیرس/لندن: یورپ کے متعدد ممالک اس وقت شدید اور غیرمعمولی گرمی کی لہر کی زد میں ہیں جہاں بڑھتے ہوئے درجہ حرارت نے انسانی زندگی، صحت کے نظام اور روزمرہ معمولات کو بری طرح متاثر کر دیا ہے۔
اسپین میں جاری ہیٹ ویو کے باعث گزشتہ چار روز کے دوران ہلاکتوں کی تعداد 212 تک پہنچ گئی ہے۔ حکام کے مطابق ملک کے مختلف علاقوں میں درجہ حرارت 42 ڈگری سینٹی گریڈ تک ریکارڈ کیا گیا جس کے باعث بزرگ افراد، بیمار شہریوں اور بچوں کو شدید مشکلات کا سامنا ہے۔
فرانس میں بھی شدید گرمی کے باعث صورتحال تشویشناک ہوتی جا رہی ہے۔ فرانسیسی حکام کے مطابق ہیٹ ویو کے نتیجے میں کم از کم 50 افراد جان کی بازی ہار چکے ہیں جبکہ کئی علاقوں میں درجہ حرارت 44 ڈگری سینٹی گریڈ سے تجاوز کر گیا ہے۔ ماہرین کے مطابق گزشتہ 80 برس میں پہلی مرتبہ اتنی شدید گرمی ریکارڈ کی گئی ہے۔
اٹلی بھی شدید موسمی حالات سے متاثر ہے جہاں صرف گزشتہ 24 گھنٹوں کے دوران گرمی سے متعلق واقعات میں 5 افراد ہلاک ہوئے۔ متعدد شہروں میں شہریوں کو دوپہر کے اوقات میں گھروں سے غیر ضروری طور پر باہر نہ نکلنے کی ہدایات جاری کی گئی ہیں۔
دوسری جانب برطانیہ میں محکمہ موسمیات نے لندن اور جنوب مشرقی انگلینڈ کے لیے شدید گرمی کی ریڈ وارننگ میں مزید توسیع کر دی ہے۔ پیش گوئی کے مطابق آئندہ روز بھی درجہ حرارت 30 سے 40 ڈگری سینٹی گریڈ کے درمیان رہنے کا امکان ہے، جس سے صحت عامہ کے مسائل میں اضافہ ہو سکتا ہے۔
شدید گرمی کے باعث یورپ بھر کے اسپتالوں میں مریضوں کی تعداد بڑھ رہی ہے۔ طبی ماہرین کے مطابق ہیٹ اسٹروک، پانی کی کمی اور سانس کی بیماریوں میں مبتلا افراد کی بڑی تعداد اسپتالوں کا رخ کر رہی ہے۔
رائل کالج آف فزیشنز نے خبردار کیا ہے کہ بلند درجہ حرارت نہ صرف انسانی صحت کے لیے خطرہ بن رہا ہے بلکہ اسپتالوں میں استعمال ہونے والی مشینری اور حساس طبی آلات کی کارکردگی بھی متاثر ہو رہی ہے، جس سے علاج معالجے کے نظام پر اضافی دباؤ پڑ رہا ہے۔
ماہرین موسمیات کا کہنا ہے کہ یورپ میں بار بار آنے والی شدید گرمی کی لہریں موسمیاتی تبدیلیوں کے بڑھتے ہوئے اثرات کی عکاسی کرتی ہیں۔ مختلف حکومتوں نے شہریوں کو احتیاطی تدابیر اختیار کرنے، زیادہ پانی پینے اور دھوپ میں غیر ضروری نقل و حرکت سے گریز کرنے کی ہدایت کی ہے۔
یورپی ممالک میں ہیٹ ویو کے جاری رہنے کے باعث حکام ہنگامی صورتحال سے نمٹنے کے لیے اضافی اقدامات کر رہے ہیں جبکہ عوام کو مسلسل حفاظتی مشورے دیے جا رہے ہیں۔