اسلام آباد: نواسۂ رسول حضرت امام حسین رضی اللہ تعالیٰ عنہ اور ان کے جانثار ساتھیوں کی میدانِ کربلا میں عظیم قربانی کی یاد میں ملک بھر میں یومِ عاشور مذہبی عقیدت و احترام کے ساتھ منایا جا رہا ہے۔ اس موقع پر چھوٹے بڑے شہروں میں مجالسِ عزا منعقد کی جا رہی ہیں جبکہ شبیہِ علم، تابوت اور ذوالجناح کے جلوس اپنے روایتی راستوں پر برآمد ہو رہے ہیں۔
چودہ سو برس قبل پیش آنے والے سانحۂ کربلا کی یاد میں عزادار حضرت امام حسینؓ، اہلِ بیتؓ اور شہدائے کربلا کو خراجِ عقیدت پیش کر رہے ہیں۔ مجالس میں علمائے کرام اور ذاکرین حضرت امام حسینؓ کی قربانی، صبر، استقامت اور حق و صداقت کے لیے دی جانے والی لازوال قربانی پر روشنی ڈال رہے ہیں۔
کراچی میں مرکزی جلوس نشتر پارک سے برآمد
کراچی میں یومِ عاشور کا مرکزی جلوس نشتر پارک میں مجلسِ عزا کے اختتام کے بعد برآمد ہوا، جو اپنے مقررہ راستوں سے گزرتا ہوا امام بارگاہ حسینیہ ایرانیاں کھارادر پہنچ کر اختتام پذیر ہوگا۔ جلوس کے راستوں پر سیکیورٹی کے غیر معمولی انتظامات کیے گئے ہیں جبکہ عزاداروں کے لیے سبیلوں اور نیاز کا بھی وسیع انتظام موجود ہے۔
لاہور میں نثار حویلی سے کربلا گامے شاہ تک جلوس
لاہور میں مرکزی جلوس اندرون موچی گیٹ کی تاریخی نثار حویلی سے برآمد ہوا، جو روایتی راستوں سے ہوتا ہوا کربلا گامے شاہ کی جانب رواں دواں ہے۔ جلوس میں ہزاروں مرد، خواتین اور بچے شریک ہیں، جبکہ جلوس کے راستوں پر فول پروف سیکیورٹی اور ٹریفک کے خصوصی انتظامات کیے گئے ہیں۔
دیگر شہروں میں بھی عزاداری
ملتان، پشاور، کوئٹہ، اسلام آباد، راولپنڈی، فیصل آباد، گلگت، اسکردو، مظفرآباد سمیت ملک کے مختلف شہروں میں بھی یومِ عاشور کے جلوس برآمد کیے جا رہے ہیں۔ مختلف مقامات پر مجالسِ عزا کا انعقاد جاری ہے جبکہ عزادار حضرت امام حسینؓ اور شہدائے کربلا کی یاد میں ماتم اور نوحہ خوانی کر رہے ہیں۔
نیاز اور سبیلوں کا اہتمام
کربلا میں تین روز کی بھوک اور پیاس کے بعد حضرت امام حسینؓ، اہلِ بیتؓ اور ان کے وفادار ساتھیوں کی شہادت کی یاد میں ملک بھر میں مختلف مقامات پر نیاز تقسیم کی جا رہی ہے، جبکہ عزاداروں اور شہریوں کے لیے ٹھنڈے پانی، شربت اور دیگر مشروبات کی سبیلیں بھی لگائی گئی ہیں۔
سیکیورٹی ہائی الرٹ
یومِ عاشور کے موقع پر ملک بھر میں سیکیورٹی ہائی الرٹ ہے۔ جلوسوں اور مجالس کی حفاظت کے لیے پولیس، رینجرز اور دیگر قانون نافذ کرنے والے اداروں کے اہلکار تعینات ہیں، جبکہ حساس علاقوں میں سی سی ٹی وی کیمروں، واک تھرو گیٹس اور ڈرون نگرانی سمیت خصوصی حفاظتی اقدامات کیے گئے ہیں۔
واقعۂ کربلا کا پیغام
واقعۂ کربلا اسلامی تاریخ کا ایک عظیم باب ہے، جو حق، انصاف، صبر، استقامت اور باطل کے خلاف ڈٹ جانے کی لازوال مثال کے طور پر ہمیشہ یاد رکھا جائے گا۔ حضرت امام حسینؓ اور ان کے جانثاروں کی عظیم قربانی امتِ مسلمہ کے لیے اتحاد، ایثار اور دینِ اسلام کی سربلندی کا روشن پیغام ہے۔