خاران: بلوچستان کے ضلع خاران میں سکیورٹی فورسز نے انٹیلی جنس کی بنیاد پر کارروائی کرتے ہوئے فتنہ الخوارج سے وابستہ 7 دہشتگردوں کو ہلاک کردیا، جبکہ آپریشن کے دوران متعدد دہشتگردوں کے زخمی ہونے کی بھی اطلاعات ہیں۔
سکیورٹی ذرائع کے مطابق خاران کے علاقے لجے میں دہشتگردوں کی موجودگی کی اطلاع پر سکیورٹی فورسز نے انٹیلی جنس بیسڈ آپریشن کیا۔ کارروائی کے دوران دہشتگردوں اور سکیورٹی فورسز کے درمیان فائرنگ کا تبادلہ ہوا، جس میں 7 دہشتگرد مارے گئے۔
ذرائع کے مطابق کارروائی کے بعد دہشتگردوں کے ٹھکانوں کی تلاشی لی گئی، جہاں سے جدید اسلحہ، گولہ بارود اور دیگر جنگی سامان برآمد کیا گیا۔
سکیورٹی ذرائع کا کہنا ہے کہ دہشتگردوں کے زیر استعمال ایک موٹر سائیکل اور 2 گاڑیاں بھی قبضے میں لے لی گئی ہیں، جبکہ دہشتگردوں کے ٹھکانوں کو مکمل طور پر تباہ کردیا گیا۔
ذرائع کے مطابق ہلاک دہشتگرد علاقے میں مختلف تخریبی کارروائیوں کی منصوبہ بندی اور جرائم میں ملوث تھے۔ ان میں بھتہ خوری، اغوا، ٹارگٹ کلنگ اور خودکش حملوں کی منصوبہ بندی سمیت دیگر دہشتگرد سرگرمیاں شامل ہیں۔
سکیورٹی ذرائع کا کہنا ہے کہ علاقے میں دہشتگردوں کے مکمل نیٹ ورک کے خاتمے اور ان کے سہولت کاروں تک پہنچنے کے لیے کارروائیوں کا سلسلہ جاری ہے۔
یہ کارروائی آپریشن ردالفتنہ 3 کے تحت دہشتگردی کے خاتمے کے لیے جاری سکیورٹی اقدامات کا حصہ ہے۔ سکیورٹی فورسز کی جانب سے بلوچستان کے مختلف علاقوں میں انٹیلی جنس کی بنیاد پر کارروائیاں کی جارہی ہیں تاکہ دہشتگردوں کے ٹھکانوں اور نیٹ ورک کو ختم کیا جاسکے۔
ذرائع کے مطابق خاران آپریشن میں دہشتگردوں کے ٹھکانوں سے برآمد ہونے والے اسلحے اور دیگر سامان کی مزید تحقیقات کی جارہی ہیں، جبکہ علاقے میں سرچ آپریشن بھی جاری ہے تاکہ کسی ممکنہ دہشتگرد یا سہولت کار کے فرار ہونے کے امکانات کو ختم کیا جاسکے۔
خضدار میں بھی گزشتہ روز کارروائی
خیال رہے کہ گزشتہ روز بھی بلوچستان کے علاقے خضدار میں سکیورٹی فورسز نے کارروائی کرتے ہوئے فتنہ الہندوستان سے وابستہ 10 دہشتگردوں کو ہلاک کیا تھا۔
مسلسل دو روز کے دوران بلوچستان کے مختلف علاقوں میں دہشتگردوں کے خلاف ہونے والی کارروائیوں کو سکیورٹی فورسز کی جانب سے دہشتگرد نیٹ ورک کے خلاف جاری آپریشن کا حصہ قرار دیا جارہا ہے۔
سکیورٹی ذرائع کے مطابق دہشتگردی کے مکمل خاتمے تک انٹیلی جنس بیسڈ آپریشنز اور دیگر کارروائیاں جاری رہیں گی۔