تحریک انصاف کے رہنما اور پنجاب اسمبلی میں اپوزیشن لیڈر ملک احمد خان بچھر نے 9 مئی کیس میں انسداد دہشت گردی عدالت سے سزا کا فیصلہ ہائیکورٹ میں چیلنج کرنے کا اعلان کر دیا۔
منگل کو سرگودھا کی انسدادِ دہشت گردی کی خصوصی عدالت نے 9 مئی کو میانوالی میں ہنگامہ آرائی، توڑ پھوڑ اور تھانے کو آگ لگانے کے کیس میں پی ٹی آئی رہنما اور پنجاب اسمبلی کے اپوزیشن لیڈر ملک احمد خان بھچر سمیت 36 مجرموں کو 10،10 سال قید کی سزا سنا ئی۔
عدالت نے احمد بچھر کو 60 لاکھ روپے جرمانے کی سزا بھی سنائی۔ عدالت نے تمام 36 ملزمان کو گرفتار کرنے اور جیل منتقل کرنے کا حکم دیا۔
پنجاب اسمبلی میں اپوزیشن لیڈر ملک احمد خان بچھر نے انسداددہشت گردی عدالت کا فیصلہ چیلنج کرنے کا اعلان کرتے ہوئے کہا کہ عدالت نے سیاسی بنیادوں پر قائم مقدمے کا آئین سے ہٹ کر فیصلہ دیا۔
ملک احمد خان بچھر نے کہا کہ قانونی ضابطے پورے کیے بغیر سزا کا فیصلہ سنایا گیا، 26 ویں ترمیم کے بعد حکومت نے عدالتوں کو اپنے تابع کرلیا ہے۔
ان کا کہنا تھا کہ 9 مئی کے سیاسی مقدمات میں ہمیں اس طرح کے فیصلوں کی امید ہے، تحریری فیصلہ موصول ہونے کے بعد ہائیکورٹ سے رجوع کریں گے۔