اسلام آباد: وزیراعظم پاکستان محمد شہباز شریف 5 سے 7 اکتوبر تک سرکاری دورے پر ملائیشیا کے دارالحکومت کوالالمپور روانہ ہوگئے۔ وزیراعظم یہ دورہ ملائیشیا کے وزیراعظم انور ابراہیم کی خصوصی دعوت پر کر رہے ہیں۔
وزیراعظم کے ہمراہ نائب وزیراعظم و وزیرِ خارجہ اسحاق ڈار، وفاقی وزیر اطلاعات و نشریات عطاء اللہ تارڑ اور وزیراعظم کے معاونِ خصوصی طارق فاطمی بھی موجود ہیں۔
اعلیٰ سطحی ملاقاتیں اور معاہدے
وزیراعظم شہباز شریف اپنے دورے کے دوران ملائیشیا کے وزیراعظم انور ابراہیم سے ون آن ون ملاقات کریں گے، جبکہ وفود کی سطح پر مذاکرات بھی ہوں گے۔
دورے کے دوران دونوں ممالک کے درمیان مختلف شعبوں میں تعاون کے معاہدوں اور مفاہمتی یادداشتوں (MoUs) پر دستخط متوقع ہیں۔
دوطرفہ تعلقات میں وسعت
دونوں رہنما تجارت، آئی ٹی اور ٹیلی کام، حلال انڈسٹری، سرمایہ کاری، تعلیم، توانائی، انفراسٹرکچر اور ڈیجیٹل معیشت کے شعبوں میں دوطرفہ تعاون کے فروغ پر تبادلہ خیال کریں گے۔
علاوہ ازیں، عوام سے عوام کے تعلقات (People-to-People Contacts) بڑھانے اور نئے تعاون کے مواقع تلاش کرنے پر بھی بات چیت ہوگی۔
یہ دورہ پاکستان اور ملائیشیا کے درمیان اقتصادی، تکنیکی اور ثقافتی تعلقات کو مزید مضبوط بنانے کے لیے ایک اہم قدم قرار دیا جا رہا ہے۔