پشاور: خیبر پختونخواہ میں بڑھتی ہوئی دہشت گردی کے خطرے کے پیشِ نظر سنٹرل پولیس آفس پشاور نے صوبے کے اندر آپریشنل اہلیت بڑھانے کے لیے پہلا اسنائپر اسکواڈ تیار کرلیا ہے۔ سی پی او پشاور کے مطابق نئے اسنائپر اسکواڈز کو جدید تربیت اور جدید اسلحہ فراہم کیا گیا ہے۔
اس اطلاع میں بتایا گیا ہے کہ ہر اسکواڈ میں دس اہلکار شامل ہوں گے اور انہیں پہاڑی وادیوں، سرحدی علاقوں اور جنوبی اضلاع میں تعینات کر کے استعمال کیا جائے گا۔ پولیس نے کہا کہ اسکواڈ کو دور فاصلے پر چھپے دشمن کو نشانہ بنانے کی خصوصی تربیت دی گئی ہے تاکہ حساس اور خطرناک آپریشنز میں بروقت اور مؤثر جواب ممکن ہو سکے۔
ابتدائی طور پر یہ اسکواڈز جنوبی اضلاع، ملاکنڈ ڈویژن اور سرحدی علاقوں میں تعینات کیے جائیں گے۔ سی پی او پشاور نے مزید بتایا کہ سرد موسم میں اسنائپر اسکواڈز کو جدید تھرمل امیجنگ ڈیوائسز بھی فراہم کی جائیں گی، تاکہ کم روشنی یا ناموافق موسمی حالات میں بھی اہداف کی نشاندہی اور ٹارگٹنگ ممکن ہو سکے۔ ایک ایلیٹ فورس اسنائپر اسکواڈ کو تین ماہ کی جدید اسنائپر ٹریننگ بھی دی گئی ہے۔
پولیس کے بیان میں یہ بھی نشاندہی کی گئی کہ یہ قدم علاقے میں سیکیورٹی کی صورتحال میں بہتری اور دہشت گردی کے واقعات کو روکنے کے لیے اٹھایا گیا ہے۔ مزید تفصیلات یا باضابطہ تعیناتی کے اعلانات مقامی کمانڈز کی جانب سے بعد میں جاری کیے جائیں گے۔