اسلام آباد: جمعیت علماء اسلام (جے یو آئی) نے سینیٹر احمد خان کی پارٹی رکنیت ختم کر دی۔ جے یو آئی کی جانب سے جاری اعلامیے کے مطابق احمد خان کو 27 ویں آئینی ترمیم کے حق میں ووٹ دینے پر پارٹی سے خارج کیا گیا ہے۔
اعلامیے میں کہا گیا ہے کہ سینیٹر احمد خان نے پارٹی پالیسی کی خلاف ورزی کی، اس لیے انہیں فوری طور پر سینیٹ کی نشست سے مستعفی ہو جانا چاہیے۔ جے یو آئی نے واضح کیا کہ اگر احمد خان نے استعفیٰ نہ دیا تو ان کی نااہلی کے لیے الیکشن کمیشن سے رجوع کیا جائے گا۔
خیال رہے کہ سینیٹ نے 27 ویں آئینی ترمیم 64 ووٹوں کی بھاری حمایت کے ساتھ منظور کی تھی، جبکہ اس کے خلاف کوئی ووٹ نہیں آیا تھا۔ اس ترمیم کی حمایت میں ووٹ دینے والے اراکین میں سینیٹر احمد خان بھی شامل تھے۔