اسلام آباد: وفاقی آئینی عدالت کے سربراہ کے طور پر جسٹس امین الدین کی تقرری کا امکان ظاہر کیا جا رہا ہے۔ ذرائع کے مطابق اس حوالے سے نوٹیفکیشن آج جاری کیے جانے کا امکان ہے۔
جسٹس امین الدین اس وقت سپریم کورٹ کے آئینی بینچ کے سربراہ کے طور پر خدمات انجام دے رہے ہیں اور وہ 30 نومبر کو ریٹائر ہو جائیں گے۔
چیف جسٹس کی جانب سے عشائیہ
ذرائع کے مطابق چیف جسٹس یحییٰ آفریدی کی جانب سے جسٹس امین الدین کے اعزاز میں عشائیے کا اہتمام کیا گیا ہے، جو کل چیف جسٹس ہاؤس میں ہوگا۔
سپریم کورٹ کے تمام ججز کو بھی عشائیے میں شرکت کی دعوت دی گئی ہے۔
آئینی پس منظر
خیال رہے کہ 27ویں آئینی ترمیم کے بعد وفاقی آئینی عدالت کے قیام کی راہ ہموار ہو چکی ہے۔ یہ ترمیم صدرِ مملکت آصف علی زرداری کے دستخط کے بعد آئینِ پاکستان کا حصہ بن چکی ہے۔
ترمیم کے مطابق:
• آرٹیکل 176 میں تبدیلی کی گئی ہے، جس کے تحت موجودہ چیف جسٹس اپنی مدتِ ملازمت پوری ہونے تک چیف جسٹس پاکستان کہلائیں گے۔
• آرٹیکل 255 (شق 2) کے تحت آئندہ چیف جسٹس پاکستان کا انتخاب چیف جسٹس سپریم کورٹ اور چیف جسٹس وفاقی آئینی عدالت میں سے سینئر ترین جج کے طور پر کیا جائے گا۔
• صدر مملکت، وزیراعظم کی ایڈوائس پر وفاقی آئینی عدالت کے ججز کی تقرری کریں گے۔