وانا: وفاقی وزیر داخلہ محسن نقوی نے کہا ہے کہ فیلڈ مارشل واضح کر چکے ہیں کہ دہشتگردوں سے کوئی بات چیت نہیں ہوگی اور ریاست دہشتگردی کے خلاف مکمل سخت مؤقف پر قائم ہے۔
وزیر داخلہ نے کیڈٹ کالج وانا کا دورہ کیا جہاں انہیں کالج پر خوارج کے حملے کو ناکام بنانے والے آپریشن پر تفصیلی بریفنگ دی گئی۔ اس موقع پر انہوں نے کالج کے اساتذہ، طلبہ اور قبائلی عمائدین سے بھی ملاقات کی۔
“بچوں کو نشانہ بنانے والے درندوں کا کوئی مذہب نہیں”
محسن نقوی نے کہا کہ کوئی بھی مذہب بے گناہ بچوں پر حملے کی اجازت نہیں دیتا، اور کیڈٹ کالج پر حملہ کرنے والے درندوں کا کسی مذہب یا انسانیت سے کوئی تعلق نہیں۔
انہوں نے اعلان کیا کہ فیلڈ مارشل کی ہدایت پر کیڈٹ کالج وانا کی مکمل تزئین و آرائش بہترین انداز میں کی جائے گی۔
دہشتگردی بیرونِ ملک سے مسلط کی جا رہی ہے: وزیر داخلہ
وزیر داخلہ نے کہا:
“پاکستان میں دہشتگردی بیرون ملک سے ہو رہی ہے، کسی کو ملک کا امن تباہ کرنے کی اجازت نہیں دیں گے۔ فیلڈ مارشل کہہ چکے ہیں کہ دہشتگردوں سے بات نہیں ہوگی۔”
قبائلی عمائدین کا پاک فوج اور فیلڈ مارشل سے اظہارِ تشکر
قبائلی عمائدین نے کیڈٹ کالج وانا کے طلبہ کو محفوظ رکھنے پر پاک فوج اور فیلڈ مارشل کا شکریہ ادا کیا۔
انہوں نے کہا کہ دہشتگرد اسلام سے خارج ہیں اور ان کا انسانیت سے بھی کوئی تعلق نہیں۔
کیڈٹ کالج وانا پر حملے کو ناکام بنانے کے بعد قبائلی عمائدین اور سیکیورٹی اداروں کا عزم ایک بار پھر دہشتگردی کے خلاف قومی اتحاد کو نمایاں کرتا ہے۔