راولپنڈی کے علاقے صدرمیں غیرملکی فوڈ چین کی برانچ میں ہنگامہ آرائی اور گالم گلوچ کا مقدمہ درج کرلیا گیا۔
اتوار اورسوموار کی درمیانی رات راولپنڈی کے علاقہ صدر میں ڈنڈا بردار افراد نے انٹرنیشنل فوڈ چین میں داخل ہوکر حملہ کردیا۔ ڈنڈا بردار افراد نے ریسٹورنٹ میں توڑپھوڑ اور ہنگامہ آرائی کی، عورتوں، بچوں اور ریسٹورنٹ کے عملے کو ہراساں کیا۔
مشتعل افراد نے ریسٹورنٹ کے عملے کو سنگین نتائج کی دھمکیاں دی اور بیہودہ زبان استعمال کرتے رہے۔
تھانہ کینٹ پولیس نے انٹرنیشنل فوڈ چین میں ہنگامہ آرائی کرنے والے افراد کے خلاف مقدمہ درج کرلیا۔ ترجمان پولیس کا کہنا ہے ملزمان کی شناخت کرلی ہے اور قانون کی خلاف ورزی اور ہنگامہ آرائی کرنے والوں سے آہنی ہاتھوں سے نمٹا جائے گا۔