ایشیا کپ ٹرافی کے معاملے پر پاکستان کرکٹ بورڈ (پی سی بی) اور بھارتی کرکٹ کنٹرول بورڈ (بی سی سی آئی) کے درمیان جاری تناؤ میں مثبت پیش رفت سامنے آئی ہے۔
بی سی سی آئی کے سیکرٹری دیوا جیت سائیکیا نے بھارتی میڈیا سے گفتگو میں تصدیق کی کہ ایشیا کپ ٹرافی سے متعلق معاملے کے حل کے لیے آئی سی سی کے سینئر عہدیدار مصالحتی کردار ادا کر رہے ہیں۔
سائیکیا کے مطابق:
’’امید ہے کہ معاملہ باہمی افہام و تفہیم سے جلد حل ہوجائے گا۔‘‘
’’آئی سی سی یا کسی اور ادارے کی جانب سے سخت قدم اٹھانے کی نوبت نہیں آئے گی۔‘‘
انہوں نے کہا کہ پاکستان اور بھارت دونوں مسئلے کو جلد حل کرنے کے لیے تیار ہیں جبکہ دونوں ممالک اور بی سی سی آئی کے شائقین ایشیا کپ ٹرافی کا انتظار کر رہے ہیں۔
دیوا جیت سائیکیا نے بتایا کہ ایشیا کپ ٹرافی کا معاملہ باقاعدہ طور پر آئی سی سی کے اجلاس کے ایجنڈے میں شامل نہیں تھا، تاہم چیئرمین پی سی بی محسن نقوی کے ساتھ آئی سی سی کے تعاون سے علیحدہ ملاقات ہوئی جس میں آئی سی سی کے ایک سینئر عہدیدار بھی موجود تھے۔
سائیکیا نے مزید کہا کہ:
’’دونوں سائیڈز کے درمیان برف پگھل رہی ہے۔‘‘
’’متبادل آپشنز پر غور ہو رہا ہے اور اگر حالات مثبت رہے تو آنے والے دنوں میں مسئلہ حل ہو جائے گا۔‘‘
واضح رہے کہ ایشیا کپ ٹرافی کے ڈیزائن اور اس کی تقسیم کے طریقہ کار سے متعلق اختلافات کے باعث یہ معاملہ حالیہ ہفتوں میں موضوعِ بحث بنا ہوا تھا.