لاہور: پاکستان کرکٹ بورڈ (پی سی بی) نے آئی سی سی ٹی ٹوئنٹی ورلڈ کپ کے لیے ابتدائی اسکواڈ کے نام انٹرنیشنل کرکٹ کونسل (آئی سی سی) کو بھجوا دیے ہیں۔
ذرائع کے مطابق پی سی بی نے ابتدائی 15 رکنی اسکواڈ کے ساتھ ساتھ ریزرو کھلاڑیوں کے نام بھی آئی سی سی کو ارسال کر دیے ہیں۔ ذرائع کا کہنا ہے کہ پی سی بی 31 جنوری تک آئی سی سی کی اجازت کے بغیر اسکواڈ میں تبدیلی کر سکتا ہے، تاہم اس تاریخ کے بعد کسی بھی تبدیلی کے لیے آئی سی سی کی ٹیکنیکل کمیٹی کی منظوری لازم ہوگی۔
ذرائع کے مطابق پی سی بی سری لنکا کے خلاف سیریز کے بعد ٹی ٹوئنٹی ورلڈ کپ اور آسٹریلیا کے خلاف سیریز کے لیے حتمی اسکواڈ کے اعلان کا ارادہ رکھتا ہے۔ بورڈ سری لنکا کے خلاف سیریز میں ایک سے دو کھلاڑیوں کی کارکردگی کو مدنظر رکھ کر حتمی فیصلے کرنا چاہتا ہے۔
ابتدائی اسکواڈ میں دورۂ سری لنکا کے کھلاڑیوں کے علاوہ بابر اعظم، شاہین شاہ آفریدی اور حارث رؤف کے نام بھی شامل ہیں۔
واضح رہے کہ آئی سی سی ٹی ٹوئنٹی ورلڈ کپ 7 فروری سے بھارت اور سری لنکا میں شیڈول ہے، جبکہ پاکستان ٹیم اپنے تمام میچز سری لنکا میں کھیلے گی۔