اسلام آباد: 13 سال سے زیر التواء پارلیمنٹ لاجز کے نئے بلاک کی تعمیر کا منصوبہ دوبارہ فعال کر دیا گیا۔ وفاقی وزیرِ داخلہ محسن نقوی کی ہدایت پر منصوبے پر کام تیز کردیا گیا ہے۔
وفاقی وزیرِ داخلہ محسن نقوی اور وزیرِ مملکت برائے داخلہ طلال چوہدری نے پارلیمنٹ لاجز کے زیرِ تعمیر بلاک کا دورہ کیا اور تعمیراتی کام کا معائنہ کیا۔ اس موقع پر محسن نقوی نے متعلقہ حکام کو ہدایت دی کہ نیا بلاک چار ماہ کے اندر مکمل کیا جائے تاکہ تمام پارلیمنٹرینز کو رہائش کی سہولت فراہم کی جا سکے۔
محسن نقوی نے بتایا کہ منصوبے کے لیے فنڈز کی منظوری دے دی گئی ہے اور اب اس پر ہنگامی بنیادوں پر کام جاری ہے۔ ان کا کہنا تھا کہ یہ منصوبہ 13 سال سے تعطل کا شکار رہا جس کی وجہ سے پارلیمنٹرینز کو رہائش کے مسائل کا سامنا تھا۔
چیئرمین سی ڈی اے محمد علی رندھاوا نے وزیر داخلہ کو منصوبے کے حوالے سے بریفنگ دیتے ہوئے بتایا کہ 2012 میں اس منصوبے کا ٹھیکہ دیا گیا تھا، جسے 2013 میں مکمل ہونا تھا۔ بعدازاں 2014 تک ایکسٹینشن دی گئی، تاہم کنٹریکٹر نے کام روک دیا اور قانونی پیچیدگیوں کے باعث منصوبہ تاخیر کا شکار رہا۔
بریفنگ کے مطابق، پارلیمنٹ لاجز کے نئے بلاک میں مجموعی طور پر 104 رہائشی یونٹس تعمیر کیے جا رہے ہیں۔
دورے کے موقع پر وفاقی سیکرٹری داخلہ خرم آغا، چیئرمین سی ڈی اے محمد علی رندھاوا، ڈپٹی کمشنر اسلام آباد عرفان میمن اور دیگر اعلیٰ حکام بھی موجود تھے۔
