اسلام آباد: وفاقی وزیر داخلہ محسن نقوی سے آسٹریلیا کے ہائی کمشنر نیل ہاکنز نے ملاقات کی۔ ملاقات میں پاک-آسٹریلیا تعلقات، سیکیورٹی تعاون، اور مختلف شعبوں میں باہمی تعلقات کے فروغ پر تفصیلی تبادلہ خیال کیا گیا۔
ملاقات کے دوران کوسٹ گارڈز، بارڈر مینجمنٹ اور انسانی سمگلنگ کی روک تھام کے لیے تعاون بڑھانے پر بھی بات چیت ہوئی۔
آسٹریلوی ہائی کمشنر کا اظہار افسوس اور تعریف
آسٹریلوی ہائی کمشنر نیل ہاکنز نے حالیہ دہشتگرد حملوں اور ناخوشگوار واقعات میں پولیس افسر اور سیکیورٹی فورسز کے جوانوں کی شہادت پر گہرے افسوس کا اظہار کیا۔
انہوں نے قذافی اسٹیڈیم کی خوبصورت انداز میں بحالی کے کام اور وفاقی وزیر داخلہ کی قیادت میں اسلام آباد کے فلاحی و ترقیاتی منصوبوں کی تعریف کرتے ہوئے کہا کہ:
“اسلام آباد میں واضح بہتری نظر آ رہی ہے، آپ کی قیادت میں شہر کے ترقیاتی منصوبے قابلِ ستائش ہیں۔”
آسٹریلوی ہائی کمشنر نے مزید کہا کہ انہوں نے پاکستان میں یادگار وقت گزارا، خاص طور پر لاہور میں دربار بی بی پاک دامن ان کی پسندیدہ جگہ ہے۔ ان کا کہنا تھا کہ موجودہ دور میں پاکستان کا بین الاقوامی وقار اور مقام نمایاں طور پر بڑھا ہے۔
غیر قانونی امیگریشن پر زیرو ٹالرنس پالیسی
وفاقی وزیر داخلہ محسن نقوی نے گفتگو کرتے ہوئے کہا کہ:
“غیر قانونی امیگریشن کی حوصلہ شکنی اور قانونی امیگریشن کے فروغ پر یقین رکھتے ہیں۔ ایسے افراد کو وطن واپسی پر سخت قانونی کارروائی کا سامنا کرنا پڑے گا۔”
انہوں نے کہا کہ انسانی سمگلنگ میں ملوث عناصر کے خلاف سخت کارروائیاں جاری ہیں اور اس ضمن میں قانون نافذ کرنے والے ادارے پوری طرح متحرک ہیں۔
دوطرفہ تعلقات پر گفتگو
وزیر داخلہ نے پاک-آسٹریلیا دوطرفہ تعلقات کے فروغ میں نیل ہاکنز کی کاوشوں کو سراہا اور ان کے مستقبل کے لیے نیک خواہشات کا اظہار کیا۔
ملاقات میں وزیر مملکت طلال چوہدری، وفاقی سیکرٹری داخلہ خرم آغا اور آسٹریلوی ہائی کمیشن کے اعلیٰ حکام بھی موجود تھے۔
