معروف ٹرانس جینڈر ڈانسر مہک ملک نے حال ہی میں اپنے معاوضے سے متعلق ایک ایسا انکشاف کیا ہے جس نے شوبز انڈسٹری میں سب کی توجہ حاصل کرلی ہے۔ ایک نجی انٹرویو کے دوران مہک ملک نے اپنی فیس کے بارے میں کھل کر گفتگو کی اور بتایا کہ ان کا ایک ڈانس شو کا معاوضہ ایک معروف چھوٹی گاڑی کی قیمت سے بھی زیادہ ہوتا ہے۔
انٹرویو کے دوران میزبان نے سوال کیا کہ جس طرح کئی یوٹیوبرز یہ دعویٰ کرتے ہیں کہ وہ اپنی ماہانہ آمدنی سے ایک یا ایک سے زائد آلٹو گاڑیاں خرید سکتے ہیں، کیا شوبز میں بھی ایسا ممکن ہے؟ اس سوال کے جواب میں مہک ملک نے مسکراتے ہوئے کہا کہ بالکل اسی طرح وہ بھی ایک ہی ڈرامے یا شو کا معاوضہ اتنا وصول کر لیتی ہیں کہ اس رقم سے ایک یا ڈیڑھ آلٹو آرام سے خریدی جاسکتی ہے۔
مہک ملک کے اس بیان نے سوشل میڈیا پر خاصی توجہ حاصل کی، جہاں صارفین ان کی کامیابی اور محنت کو سراہتے نظر آئے۔ ان کا کہنا تھا کہ یہ سب کچھ برسوں کی محنت، جدوجہد اور اپنے فن سے لگن کا نتیجہ ہے۔
دورانِ انٹرویو میزبان نے اداکارہ نرگس کے معاوضے سے مہک ملک کے معاوضے کا موازنہ کرتے ہوئے سوال کیا۔ اس پر مہک ملک نے نہایت محتاط انداز اپناتے ہوئے کہا کہ ان کی اداکارہ نرگس سے کبھی ملاقات نہیں ہوئی، اس لیے وہ ان کے معاوضے کے بارے میں کوئی حتمی بات نہیں کرسکتیں۔ تاہم انہوں نے یہ ضرور واضح کیا کہ ان کا اپنا معاوضہ 20 لاکھ روپے سے زائد ہے۔
مہک ملک نے مزید کہا کہ شوبز انڈسٹری میں کامیابی آسانی سے نہیں ملتی اور ٹرانس جینڈر کمیونٹی کے لیے یہ سفر اور بھی مشکل ہوتا ہے، لیکن وہ اپنی پہچان اور مقام پر فخر محسوس کرتی ہیں۔
واضح رہے کہ مہک ملک پاکستان کی معروف ٹرانس جینڈر فنکاراؤں میں شمار ہوتی ہیں اور ان کے ڈانس شوز ملک بھر میں مقبول ہیں۔ ان کے حالیہ انکشاف نے ایک بار پھر یہ ثابت کردیا ہے کہ ٹیلنٹ اور محنت کی بدولت شوبز میں بڑی کامیابیاں حاصل کی جاسکتی ہیں۔
