وزیر اعلیٰ پنجاب مریم نواز شریف کی ہدایت پر نوراجہ بھٹہ فلڈ بند کے شگاف کو پُر کرنے کے لیے ہنگامی بنیادوں پر آپریشن جاری ہے۔ فلڈ بند پر مزید بھاری مشینری پہنچا دی گئی ہے تاکہ شگاف کو جلد از جلد بند کیا جا سکے۔
تفصیلات کے مطابق فلڈ بند پر شگاف کو پر کرنے کے لیے درکار 44 بھاری مشینیں موقع پر پہنچا دی گئی ہیں، جبکہ محکمہ آبپاشی (Irrigation Department) کے تمام افسران بھی موقع پر موجود ہیں اور آپریشن کی براہِ راست نگرانی کر رہے ہیں۔
فلڈ بند پر ٹرکوں کے ذریعے مسلسل پتھر اور مٹی ڈالنے کا عمل تیزی سے جاری ہے تاکہ پانی کے بہاؤ کو کنٹرول کیا جا سکے اور کسی بڑے نقصان سے بچا جا سکے۔
وزیر اعلیٰ پنجاب مریم نواز شریف نے اس صورتحال کو خصوصی اہمیت دیتے ہوئے سینئر منسٹر اور صوبائی وزیر آبپاشی کو آپریشن کی مانیٹرنگ پر مامور کیا ہے۔ فلڈ بند پر جاری ہنگامی آپریشن کی لمحہ بہ لمحہ رپورٹ وزیر اعلیٰ کو پیش کی جا رہی ہے۔
محکمہ آبپاشی کے حکام کے مطابق، شگاف کو جلد از جلد پُر کرنے کے لیے تمام وسائل بروئے کار لائے جا رہے ہیں اور ریسکیو ٹیمیں بھی الرٹ ہیں تاکہ کسی بھی ہنگامی صورتحال سے نمٹا جا سکے۔
ذرائع کے مطابق، فلڈ بند پر ہونے والے اس آپریشن کی تکمیل سے علاقے میں سیلابی پانی کے دباؤ کو کم کرنے اور قریبی آبادیوں کو بڑے نقصان سے محفوظ رکھنے میں مدد ملے گی۔
