اسلام آباد میں ایوانِ صدر میں منعقدہ خصوصی تقریب میں صدرِ مملکت آصف علی زرداری نے اردن کے شاہ عبداللہ دوم کو پاکستان کا اعلیٰ ترین سول اعزاز ’نشانِ پاکستان‘ عطا کیا۔ تقریب کے آغاز پر دونوں ممالک کے قومی ترانے بجائے گئے، جبکہ معزز مہمان کا پرتپاک استقبال کیا گیا۔
تقریب میں وزیراعظم شہباز شریف، فیلڈ مارشل سید عاصم منیر، ائیر چیف مارشل ظہیر احمد بابر سدھو اور نیول چیف ایڈمرل نوید اشرف سمیت وفاقی کابینہ کے ارکان اور مختلف ممالک کے سفرا بھی شریک ہوئے۔
شاہ عبداللہ دوم کو یہ اعزاز پاکستان اور اردن کے درمیان دوطرفہ تعلقات کو مضبوط بنانے، خطے اور عالمی سطح پر امن و استحکام کے لیے ان کی نمایاں خدمات کے اعتراف میں دیا گیا۔
تقریب کے دوران اردن کے شاہ نے صدرِ پاکستان آصف علی زرداری کو اپنے ملک کے اعلیٰ ترین اعزاز ’’وسامُ النّہضہ المرصّع‘‘ سے نوازا، جو سربراہانِ مملکت اور نمایاں عالمی شخصیات کو دیا جاتا ہے۔
صدرِ مملکت کو دیا گیا اعزاز پاکستان کے لیے اردن کی جانب سے گہرے احترام، تحسین اور دیرینہ دوستی کی علامت قرار دیا جا رہا ہے۔
