پنجاب میں موسم کی تبدیلی اور سموگ سے نمٹنے کے لیے بڑے انتظامات مکمل

لاہور: صوبہ پنجاب میں موسم کی صورتحال بدلنے لگی ہے اور مختلف شہروں میں رات کے وقت درجہ حرارت میں نمایاں کمی ریکارڈ کی گئی ہے۔ اس کے ساتھ ہی پنجاب کی تاریخ میں پہلی مرتبہ سموگ کی پیشگی اطلاع، تجزیے اور موسمیاتی نگرانی کے جدید نظام کے تحت ڈیٹا جاری کر دیا گیا ہے، جس کے مطابق فی الحال سموگ کی صورتحال قابو میں ہے۔

ترجمان کے مطابق جدید موسمیاتی پیشگوئی کے نظام کی مدد سے رواں سال سردی اور سموگ کے سیزن میں پیشگی معلومات پہلی بار عوام کے لیے دستیاب ہوں گی۔

وزیراعلیٰ پنجاب مریم نواز شریف کی ہدایت پر گزشتہ سال کے مقابلے میں سموگ سے بچاؤ اور احتیاطی تدابیر کے لیے مزید جامع تیاریاں کر لی گئی ہیں۔ وزیراعلیٰ نے سینئر صوبائی وزیر مریم اورنگزیب کو گرینڈ صوبائی اینٹی سموگ آپریشن کی نگرانی کی ذمہ داری سونپی ہے۔

ہوا کے معیار کی صورتحال
• لاہور: 152
• قصور: 144
• سیالکوٹ: 154
• گوجرانوالہ: 160
• فیصل آباد: 156
• ملتان: 139
• بہاولپور: 115
• راولپنڈی: 114
• مری: 48

محکمہ موسمیات کے مطابق دن کے وقت زیادہ سے زیادہ درجہ حرارت 35 سے 36 ڈگری اور رات کے وقت 25 سے 26 ڈگری سینٹی گریڈ ریکارڈ کیا گیا، جبکہ شمال اور مشرق کی طرف ہواؤں کا بہاؤ جاری ہے۔

سموگ سے بچاؤ کے اقدامات
• ماحولیاتی تحفظ ایجنسی اور ضلعی انتظامیہ کو متحرک کر دیا گیا ہے۔
• فصلوں کی باقیات اور پلاسٹک جلانے پر پابندی اور سخت کارروائی کی ہدایت۔
• زیر تعمیر عمارتوں کا ملبہ ڈھانپنے اور ڈھکن والے کوڑے دان یقینی بنانے کی ہدایت۔
• “ستھرا پنجاب” ٹیمیں پورے صوبے میں پانی کے چھڑکاؤ اور صفائی کے لیے متحرک۔
• پولیس سمیت تمام متعلقہ اداروں کو اینٹی سموگ آپریشن میں معاونت کے احکامات جاری۔

علاقائی صورتحال

بھارت کے شمالی پنجاب میں چاول کی فصل کی باقیات جلانے سے آلودگی پیدا ہو رہی ہے، تاہم فی الحال ہواؤں کے رخ کے باعث اس کے اثرات پاکستان میں نہیں آئے۔ حکام کے مطابق اگلے ماہ اس آلودگی کے پاکستان میں داخل ہونے کا خدشہ ہے۔

جدید اقدامات

وزیراعلیٰ پنجاب کی ہدایت پر صوبے میں پہلی مرتبہ ہوا کے معیار جانچنے والے 43 جدید آلات اور مانیٹرنگ اسٹیشن نصب کیے گئے ہیں۔ مزید برآں جدید زرعی مشینری، موسمی پیشگوئی کے نئے نظام اور آلودگی پر قابو پانے کے لیے خصوصی فورس کی تشکیل نے پنجاب کو ماحولیاتی شعبے میں نمایاں بنا دیا ہے۔