اسلام آباد: وزیرِاعظم محمد شہباز شریف سے آزاد کشمیر میں مذاکراتی عمل کی کامیابی کے بعد حکومتی مذاکراتی کمیٹی نے اسلام آباد میں ملاقات کی۔
ملاقات میں سابق اسپیکر قومی اسمبلی راجہ پرویز اشرف، قمر الزمان کائرہ، مشیرِ وزیرِاعظم رانا ثناء اللہ، وفاقی وزراء احسن اقبال، محمد اورنگزیب، سردار محمد یوسف، ڈاکٹر طارق فضل چوہدری، احد خان چیمہ اور چیئرمین یوتھ پروگرام رانا مشہود احمد خان شریک تھے۔
وزیراعظم نے مذاکراتی کمیٹی کے ارکان کی آزاد کشمیر میں معاملات کو احسن طور پر حل کرنے کی کاوشوں کو سراہا اور انہیں تحسین پیش کی۔
وزیراعظم شہباز شریف نے کہا کہ جوائنٹ ایکشن کمیٹی نے بھی آزاد کشمیر کی ترقی و خوشحالی کے لیے بردباری اور معاملہ فہمی کا مظاہرہ کیا، جو قابلِ تحسین ہے۔
انہوں نے کہا کہ آزاد کشمیر میں تمام معاملات خوش اسلوبی سے حل ہو گئے ہیں اور کشمیری عوام کے تمام تحفظات کو دور کیا جائے گا۔
وزیراعظم نے اس عزم کا اظہار کیا کہ حکومت اپنے کشمیری بھائیوں کے مسائل کے حل کے لیے اقدامات جاری رکھے گی۔
“عوامی مفاد اور امن ہماری ترجیح ہے، اور ہم آزاد کشمیر کے عوام کی خدمت کرتے رہیں گے۔” — وزیرِاعظم شہباز شریف
انہوں نے مزید کہا کہ ماضی میں بھی کشمیری عوام کے حقوق کے محافظ تھے اور آئندہ بھی ان کے حقوق کے تحفظ کے لیے ہر ممکن قدم اٹھایا جائے گا۔
وزیراعظم نے کہا کہ ان کی حکومت نے ہمیشہ آزاد کشمیر کے مسائل کو ترجیحی بنیادوں پر حل کیا ہے، اور مستقبل میں بھی کشمیری عوام کی امنگوں کے مطابق ترقی و خوشحالی کے اقدامات جاری رہیں گے۔
