کیا ملٹری کورٹس میں زیادہ سزائیں ہوتی ہیں، اس لیے کیسز جاتے ہیں؟ جج آئینی بینچ

اسلام آباد: سپریم کورٹ میں سویلینز کے فوجی عدالتوں میں ٹرائل کے کیس میں جسٹس جمال مندوخیل نے سوال اٹھایا کہ کیا ملٹری کورٹس میں زیادہ سزائیں ہوتی ہیں، اس لیے کیسز جاتے ہیں؟ 

سپریم کورٹ کے 7 رکنی آئینی بینچ نے جسٹس امین الدین خان کی سربراہی میں سویلینز کےفوجی عدالتوں میں ٹرائل کےفیصلے کے خلاف اپیل پر سماعت پر سماعت کی جس سلسلے میں وزارت دفاع کے وکیل خواجہ حارث نے جواب الجواب کے دلائل دیے۔

خواجہ حارث نے دلائل دیتے ہوئے کہا کہ جرم ڈیفنس آف پاکستان یا سروس ڈیفنس آف پاکستان سے متعلقہ ہو تو ٹرائل ملٹری کورٹ میں ہوگا، اس موقع پر جسٹس جمال مندوخیل نے پوچھا ڈیفنس آف پاکستان کی تعریف کیا ہے؟

جسٹس مندوخیل نے ریمارکس دیے ڈیفنس آف پاکستان کی تعریف میں جائیں تو سپریم کورٹ، پارلیمنٹ ڈیفنس آف پاکستان کی تعریف میں آتے ہیں، ڈیفنس آف پاکستان کی تعریف میں جائیں تو ریلویز اسٹیشنز بھی اس کی تعریف میں آتے ہیں۔

جسٹس نعیم افغان نے کہا کہ بہت سے کینٹ کے علاقوں میں شاپنگ مال اور دیگر تجارتی سرگرمیاں ہوتی ہیں، ایسی جگہوں پر بغیر اجازت نامے کے داخلہ نہیں ہوسکتا، اگر کوئی اس کے باوجود وہاں جانے کی کوشش کرے تو کیا ٹرائل ملٹری کورٹ میں ہوگا؟

جسٹس محمد علی مظہر نے کہا کراچی میں 6 سے7 کینٹ ایریاز ہیں، وہاں ایسا تو نہیں ہے کہ مرکزی شاہراہوں کو بھی ممنوعہ علاقہ قرار دیا گیا ہو، اس پر جسٹس حسن رضوی نے کہا ہم سپریم کورٹ کے 5 سے 6 ججز کلفٹن کینٹ کے رہائشی ہیں، وہاں تو ممنوعہ علاقہ نوٹیفائیڈ نہیں۔

اس موقع پر جسٹس جمال مندوخیل نے کہا مجھے ایک مرتبہ اجازت نامہ نہ ہونے کے سبب کینٹ ایریا میں داخل نہیں ہونے دیا گیا۔

جسٹس مندوخیل نے مزید کہا کہ پاکستان میں آفیشل سیکرٹ ایکٹ تو شروع سے موجود ہے،کیا ملٹری کورٹس میں زیادہ سزائیں ہوتی ہیں، اس لیے کیسز جاتے ہیں، عام عدالتوں میں ٹرائل کیوں نہیں چلتے؟ اس سے اختلاف نہیں کہ آرمی ایکٹ درست قانون ہے۔

جسٹس مندوخیل نے سوال کیا کہ ملٹری ٹرائل کےلیے آزادانہ فورم کیوں نہیں ہے؟ اس پر وکیل وزارت دفاع نے جواب دیا کہ آئین کہتا ہے ملٹری ٹرائل کو بنیادی حقوق کے تناظر میں نہیں جانچا جا سکتا۔