بلوچستان میں ترقیاتی منصوبوں پر عملدرآمد تیز کیا جائے، وزیراعلیٰ میر سرفراز بگٹی

کوئٹہ: وزیراعلیٰ بلوچستان میر سرفراز بگٹی کی زیر صدارت پبلک سیکٹر ڈویلپمنٹ پروگرام (PSDP) پر عملدرآمد سے متعلق اعلیٰ سطح اجلاس ہوا جس میں صوبائی وزرا، چیف سیکرٹری بلوچستان اور تمام محکموں کے انتظامی سیکرٹریز نے شرکت کی۔

ایڈیشنل چیف سیکرٹری منصوبہ بندی و ترقیات زاہد سلیم نے جاری منصوبوں پر تفصیلی بریفنگ دی۔ وزیراعلیٰ نے تیزی سے کام کرنے والے محکموں کو سراہا جبکہ سست روی کے مرتکب محکموں کی سرزنش کی۔ انہوں نے تمام محکموں کو ہدایت کی کہ منظور شدہ اسکیمیں جنوری تک ہر صورت مکمل کی جائیں۔

بریفنگ میں بتایا گیا کہ گرین بس منصوبے کی توسیع پر تیزی سے کام جاری ہے، نئی بسوں کی خریداری مکمل کر لی گئی ہے اور اکتوبر کے دوسرے ہفتے میں یہ بسیں کراچی پورٹ پہنچ جائیں گی۔ وزیراعلیٰ نے ہدایت دی کہ گرین اور پنک بس منصوبے کو ہر صورت اکتوبر تک مکمل کیا جائے تاکہ شہریوں کو بہتر سفری سہولیات مل سکیں۔

وزیراعلیٰ بلوچستان نے خواتین کے لیے پنک بس سروس جلد شروع کرنے کا حکم دیتے ہوئے کہا کہ ورکنگ ویمن کو آسان اقساط پر الیکٹرک بائیک فراہم کرنے کا فیصلہ بھی کیا گیا ہے تاکہ خواتین کو خودمختار بنایا جا سکے۔

انہوں نے مزید ہدایت کی کہ آئندہ بجٹ کے لیے مئی تک مجوزہ اسکیموں کی ٹیکنیکل اپروول مکمل کی جائے اور ترقیاتی منصوبوں پر عملدرآمد اور معیار کی سخت نگرانی چیف منسٹر انسپیکشن ٹیم کے ذریعے یقینی بنائی جائے۔

وزیراعلیٰ نے واضح کیا کہ بلوچستان کے عام آدمی کی مشکلات کم کرنا حکومت کی اولین ترجیح ہے اور اس مقصد کے لیے ہر محکمہ فعال کردار ادا کرے۔