پنجاب میں بلدیاتی انتخابات دسمبر کے آخری ہفتے میں ہوں گے، الیکشن کمیشن کا فیصلہ جاری

اسلام آباد: الیکشن کمیشن آف پاکستان نے پنجاب میں بلدیاتی انتخابات میں تاخیر سے متعلق درخواستوں پر محفوظ کیا گیا فیصلہ جاری کر دیا ہے، جس کے مطابق پنجاب میں بلدیاتی انتخابات رواں سال دسمبر کے آخری ہفتے میں کرائے جائیں گے۔

پنجاب میں حلقہ بندیاں کل سے شروع ہوں گی

الیکشن کمیشن کے جاری کردہ فیصلے میں کہا گیا ہے کہ پنجاب میں کل سے حلقہ بندیوں کا آغاز کر دیا جائے گا، جب کہ انتخابات بلدیاتی قانون 2022 کے تحت کرائے جائیں گے۔

فیصلہ چیف الیکشن کمشنر سکندر سلطان راجہ اور اراکین نثار درانی، شاہ محمد جتوئی اور بابر حسن بھروانہ نے جاری کیا۔

پنجاب کے قوانین میں بار بار ترامیم پر الیکشن کمیشن کے تحفظات

آج ہونے والی سماعت میں الیکشن کمیشن کو بتایا گیا کہ پنجاب حکومت نے بلدیاتی قوانین میں اب تک پانچ مرتبہ ترامیم کی ہیں اور چھٹی ترمیم بھی زیر غور ہے، تاہم موجودہ حالات میں الیکشن ایکٹ 2022 کے تحت انتخابات کرائے جا سکتے ہیں۔

چیف الیکشن کمشنر نے دورانِ سماعت ریمارکس دیے کہ

“پنجاب کے بلدیاتی انتخابات میں تاخیر کا کیس شرمندگی کا باعث بنتا جا رہا ہے۔ دیگر تینوں صوبوں اور کنٹونمنٹ بورڈز میں الیکشن ہو چکے ہیں، لہٰذا اب مزید تاخیر برداشت نہیں کی جا سکتی۔”

عدالتی کارروائی کا پس منظر

یاد رہے کہ چند روز قبل جماعت اسلامی کی درخواست پر لاہور ہائیکورٹ نے پنجاب میں بلدیاتی انتخابات نہ کروانے پر ایڈووکیٹ جنرل اور چیف سیکرٹری پنجاب کو طلب کیا تھا۔

عدالت نے ریمارکس دیے تھے کہ حکومت کی جانب سے بلدیاتی انتخابات میں تاخیر آئین کی روح کے منافی ہے اور عوام کو نمائندگی سے محروم رکھنا کسی صورت مناسب نہیں۔