وزیراعلیٰ پنجاب مریم نواز کی جرمن سفیر سے ملاقات، دو طرفہ تعاون مزید بڑھانے پر اتفاق

لاہور: وزیراعلیٰ پنجاب مریم نواز شریف سے جرمنی کی سفیر انا لیپل نے ملاقات کی، جس میں حالیہ سیلاب، ماحولیاتی تبدیلی، تعلیم، ٹیکنالوجی، تجارت اور کھیلوں کے فروغ سمیت مختلف شعبوں میں تعاون بڑھانے پر بات چیت ہوئی۔

سیلابی صورتحال اور پنجاب حکومت کے اقدامات

وزیراعلیٰ مریم نواز شریف نے بتایا کہ تین دریاؤں میں بیک وقت اونچے درجے کا سیلاب اور طویل بارشوں کے باعث پنجاب کو بدترین قدرتی آفات کا سامنا رہا، تاہم حکومت کے بروقت ریسکیو اور ریلیف آپریشن سے لاکھوں انسانی جانوں کے ساتھ ساتھ 2.2 ملین مویشیوں کو بھی محفوظ مقامات پر منتقل کیا گیا۔
ان کا کہنا تھا کہ سیلاب متاثرہ افراد کو رہائش، خوراک، علاج، چارہ اور دیگر بنیادی سہولتیں فراہم کی گئیں، جبکہ “فیلڈ ہسپتالوں اور کلینک آن وہیلز” جیسے اقدامات سے وبائی امراض پر قابو پایا گیا۔

جرمنی کے ساتھ تعلقات

وزیراعلیٰ نے جرمنی کی بروقت یکجہتی پر شکریہ ادا کرتے ہوئے کہا کہ:
• پاکستان اور جرمنی کے تعلقات دیرینہ ہیں جنہیں صوبائی سطح پر مزید وسعت دینے کے مواقع موجود ہیں۔
• جرمنی پہلے ہی جدید زرعی ٹیکنالوجی، گرین ٹیکنالوجی اور جنگلات کی افزائش میں تعاون کر رہا ہے۔
• ہنر مند افرادی قوت کے تبادلے اور ڈوئل ووکیشنل ٹریننگ ماڈل پر مزید تعاون خوش آئند ہوگا۔

مریم نواز شریف نے بتایا کہ 2024 میں دونوں ممالک کی دو طرفہ تجارت 3.63 بلین امریکی ڈالر تک پہنچ گئی ہے اور پاکستان کا تجارتی توازن مثبت رہا، اس وقت 40 جرمن کمپنیاں پاکستان میں سرمایہ کاری کر رہی ہیں جو روزگار اور نئے مواقع پیدا کر رہی ہیں۔

تعلیم، خواتین کا کردار اور ماحولیاتی چیلنجز

وزیراعلیٰ نے کہا کہ جرمنی تعلیم، ویمن ایمپاورمنٹ اور ماحولیاتی تبدیلی کے خلاف اقدامات میں پاکستان کا دیرینہ شراکت دار ہے۔ پنجاب میں ماحولیاتی تحفظ اولین ترجیح ہے کیونکہ سیلاب اور سرحد پار سموگ بڑے چیلنجز ہیں۔
انہوں نے لاہور میں قائم “اینا میری شممل ہاؤس” کی خدمات کو بھی سراہا۔

کھیلوں اور عوامی خدمات میں تعاون

وزیراعلیٰ نے کہا کہ کھیلوں کے فروغ میں بھی جرمنی کا تعاون خوش آئند ہے، حال ہی میں جرمن جونیئر ہاکی ٹیم نے لاہور کا دورہ کیا اور پنجاب مزید اسپورٹس ایکسچینج پروگرامز کا خواہاں ہے۔
ان کا کہنا تھا کہ “واسا” کے دائرہ کار کو 4 اضلاع سے بڑھا کر 23 اضلاع تک پھیلا رہے ہیں جبکہ “ستھرا پنجاب” جیسے اقدامات عوام کی زندگی میں بہتری لا رہے ہیں۔

جرمن سفیر کا ردعمل

جرمن سفیر انا لیپل نے پنجاب حکومت کی کارکردگی کو سراہا، خاص طور پر واسا ایکسپو کے دورے کو متاثر کن قرار دیا۔ ان کا کہنا تھا کہ پنجاب کے مختلف دیہی علاقوں میں سیلاب شدید تھا لیکن حکومت پنجاب نے مؤثر اور بروقت اقدامات اٹھائے۔