برطانوی نشریاتی ادارے بی بی سی نے بھی پہلگام حملے میں سکیورٹی ناکامی پر سوال اٹھا دیے۔
بی بی سی نے لکھا ہے کہ ابھی تک اس سوال کا جواب نہیں مل سکا کہ پہلگام کے مشہور سیاحتی مقام ’بیسرن‘ پر سیاحوں کی حفاظت کے لیے کوئی سکیورٹی اہلکار کیوں موجود نہیں تھا؟ جس پارک میں اتنے سیاح آتے ہوں وہاں سی سی ٹی وی کیمرہ کیوں نہیں تھا؟
رپورٹ میں کہا گیا کہ مقامی لوگوں کا کہنا ہے کہ پہلگام حملہ سکیورٹی کی خامی تھا۔
اس سے قبل ماہر امور کشمیر، سینیئر صحافی انورادھا بھسین نے کہا تھا کہ انہوں نے ہمیشہ کشمیر کے عوامی مقامات پر بھارتی فوجی تعیناتی دیکھی ہے، اس لیے پہلگام میں سکیورٹی نہ ہونا باعثِ حیرت ہے۔
انہوں نے سوال اٹھایا کہ حملے کے چند ہی گھنٹوں بعد حملہ آوروں کے نام کیسے پولیس کو مل گئے؟ پہلے تو سکیورٹی کو وہاں پہنچنے میں بہت وقت لگا، پھر دوسری جانب چند ہی گھنٹوں میں اُن کے پاس حملہ آوروں کی تصاویر تک موجود تھیں۔ وہ اس نتیجے پر کیسے پہنچے؟
انورادھا کے مطابق اب تک کی بھارتی تحقیقات قابل اعتبار نہیں لگتیں۔
واضح رہے کہ مقبوضہ کشمیر کے علاقے پہلگام میں 26 بھارتی سیاحوں کے قتل کے بعد پاکستان اور بھارت کے درمیان تناؤ بڑھ گیا ہے۔
بھارت کی جانب سے سندھ طاس معاہدے کی معطلی سمیت کیے جانے والے اقدامات پر پاکستان نے بھی بھرپور جواب دیا ہے۔
